Hinog sa punoan

Gula 85

Wala makatingog si Patrick. Ingon kini sa nahimut-okan sa iyang gisulti. Unya mibathay ang ahat nga pahiyom sa mga ngabil niini.

Pagkabuntag maoy naabtan ni Urielle si Patrick nga naghikay sa kosina. Sayo diay kining nahigmata bisan gabii nang nahiuli. Ug ingon sa gusto kining mamawi sa atraso niini kaniya kay mao man kini ang nagluto sa ilang pamahaw.

Abtik kaayong nagkuri-kuri si Patrick sa kosina. Wala gani kini makamatikod nga diha siya sa luyo niini, nagbarog sa igong gilay-on. Mao pay pagkaalinggat ni Patrick kang Urielle dihang nahuman na kini’g pangluto ug gisugdan na niini’g pahimutang ang mga linuto sa lamesa.

“Kaganina ka ra ba diha?” Pangutana sa lalaki.

“Taudtaod na gyud,” tubag ni Urielle.

“Mangaon na ta,” ni Patrick dihang napahimutang na sa talad-kan-anan ang tanang mga pagkaon.

Mitambong dayon si Urielle sa lamesa. Naglaway siyang nagtan-aw sa mga pagkaon nga giluto ni Patrick. Dihay chicken nuggets, imbutedo, cari-cari, macaroni soap ug mga prutas nga gihamyang sa lamesa. Paborito niya kini.

Nangaon dayon sila.

“Nindot ang imong mga linuto,” wala makapugong pagdayeg si Urielle. “Pulos ni paborito nako.”

“Nasayod ko,” ni Patrick. -- Sumpayan pa