Paryente nga kliyente

Kun ikaw gaw, ig-agaw man ta, obligasyon mas tawo nga motabang sa iyang paryente, okay ra. Libre akong serbisyo. Kun mobayad ka, puwede ikaw magbuot pila. Puwede libre o dako kag discount. Pero hangyo nako, ayaw lang ko dad-ig kliyente nga maoy magbuot pilay ibayad sa akong serbisyo" ni Atty. Wilben Duhig nga naggunit sa telepono karong sayong kahaponon.

Naglingkod siya sa lingkuranang motuyok tungod sa iyang lamesa sulod sa iyang bupete. Ang kaistorya niyas telepono iyang ig-agaw nga operator og mga PUJ. Kababata ug katalirungan niya si Alex Tudtud. Kabundakon ang abogado sa telepono. Apan magpugong lang siya kay di gustong molutaw nga ngil-ad og kinaiya.

Bag-o lang nakabaligya og yuta si Alex. Balig P500,000. Ang nagpreparar sa tanang papeles si Wilben. Ang bayad sa iyang serbisyo monitor sa computer. Wa pa gani ihatag. Unya ra ihatag inig larga sa anak ni Alex nga si Rel ngadto sa Amerika. Ang tanang serbisyo legal ni Wilben ngadto ni Alex, iyang kapikas nga si Delia, mga anak ug umagad, maglabing libre. Kun hatagan man siya’g sohol, di gani kaabot og diyes porsento sa tinuod nga presyo sa serbisyo. Nobenta porsento ang discount. Apan wa lay angal si Wilben. Kay niya, labor of love sa paryente.

Apan ang nakaparat kay ang paryente nga kliyente magdalag laing kliyente nga dili igbaho sa abogado. Unya ipapareha ang tratamento sa kliyenteng di kadugo sa paryente nga kliyente. "Di na sab na maayo!" Magbagulbol usahay si Wilben nga mao rang usa. Unya usa ka higayon nadunggan gyud siya sa iyang kapikas. "Unsay gibagulbol nimo diha?" ni Norelyn kapikas ni Wilben nga mao ra say sekretarya niya, gahapon sa hapon human nibiya sa bupete si Alex nga may gikuyogan. Si Norelyn maoy partner in crime ni Wilben. Uyab sila gikan pa sa working student pa si Wilben sa kurso nga Accountancy. Clerk/typist ang abogado, ni Atty. Remedio nga may bupete kaniadto duol sa Kapitolyo. Nasayod si Norelyn sa sakripisyo sa iyang bana. Gikan pa sa undergraduate nga kurso, dayon sa abogasya ug hangtud sa pag-review para sa bar exams. Way paryenteng nakapalit para niya bisag usa lang ka libro. Bugalbugal pa siya nga kuno ambisyoso o hambugero kay gustong mokab-ot sa buwan. Kaliwat man lagi silag pobre. Unya pagpasar sa bar, puwerte nang daghanang niangkon nga mapasegarbohong paryente sa ilang i-agaw.

"Si agaw Alex nagdalag kliyente doble pa katihik kay kaniya. Nagpahimog SPA, nagpanotaryo. Unya nihatag lag P200. Nitawag si Alex kay moanha.Kay dunay dinalian. Abi nakog dunay osbonon iyang Deed of Sale sa yuta nga P500,000" ni Wilben. "Klarohi na siya. Nga siya kay paryente, puwedeg libre. Pero ang laing tawo iyang dalhon, kinahanglang kontento kas bayad sa serbisyo. Kay kun dili, maayo pag way kliyente" ni Norelyn.

"Tabang ko lang na nimo, gaw. Aron modaghan imong kliyente" ni Alex sa pikas linya. "Palihug lang gaw, ayaw kog tabangi. Wa man ko magpatabang nimo. Wa ko nagkinahanglang matanga sa tabang!" ni Wilben dayong butang sa telepono. (Kataposan) (Sa gusto’g libre konsulta, dad-a ning pahina sa opisina sa tagsulat. Iatol og Sabado)