Nagkagamay ang yuta

"Uy, ngano man nga ang mohon sa akong yuta ania na man dinhi tungod sa punoan sa nangka nga didto man unta kini sa unahan sa may kabayabasan?" nakapangutana si Simon sa iyang kaugalingon ning sayong kabuntagon samtang nanghagbon ug nagadaob siya sa mga sagbot ug mga layang dahon sa iyang kaumahan.

Usa ka ektarya ang iyang yuta ug gitamnan niya og mais, mga lagutmon ug mga prutas. Namuhi usab sila og mga kahayopan sama sa manok, kanding ug baboy inabagan sa iyang asawa nga si Tosang.

Usa ra ang ilang anak nga si Linda nga nagtungha didto sa ilang lungsod sa kursong pagkamaestra.

Kasikbit sa yuta ni Simon ang yuta ni Karyo nga tunga sa ektarya. Mananggiti kini si Karyo ug may pagkabilyako usab kay kun adunay manok o kanding nga masaag og sulod sa iyang solar suwerte na kaayo kini kun makauli pagbalik ngadto sa ilang agalon kon tag-iya.

Mao kining taras ug batasan ni Karyo nga gikamud-an sa iyang mga silingan. Naguol pag-ayo si Simon kay balig diyes metro kuwadrado sa iyang yuta ang napahak kon nakuha.

Ang mohon ugod importante niini kay silbi man kini nga ilhanan sa mga utlanan sa yuta. Usa ka adlaw niana, gigastohan gyod ni Simon ang surveyor kon geodetic engineer sa ilang lungsod nga si Kolas aron masuta kun tinuod bang adunay misteryo nga nahitabo sa iyang yuta.

Pagkatapos sa survey, nasuta ni Simon nga gibalhin ang mohon sa iyang yuta. Wala damha, nakaplagan ni Tosang ang usa ka bara diha sa ilang kamaisan uban sa usa ka galong plastik nga sudlanan sa tuba ug ang tag-iya sa nahisgotang bara mao gyod si Karyo kay gitatakan man kini sa iyang pangalan.

Pilay estorya, midangop si Simon sa husgado ug namatud-ang sad-an si Karyo kay miangkon siya nga iyang gibalhin ang mohon usa ka tungang gabii niana ug nalimtan niya sa paghipos ang bara nga gigamit gumikan sa kahubog uban sa iyang kauban nga si Osting.

Nabaligya ang baka ug baboy ni Karyo agi’g bayad sa danyos kon damages nga gimando sa Korte ngadto kaniya. Busa, dili maayo nga mamintaha kita sa atong isigkatawo dinhi sa kalibotan! (Kataposan)