Hinog sa punoan

Gula 83

Mibatig kahibulong si Urielle. Karon lang nahitabo nga wala mo-reply si Patrick sa iyang text. Mao nga gisulayan niya’g miscall ang cellphone niini. Dili makontak. Either unattended or out of coverage area, matud pa.

Misantop sa hunahuna ni Urielle nga manawag sa gitrabahoan ni Patrick. Gusto niya kining ikasulti. Gikab-ot niya ang awditibo sa telepono nga diha ra sa duol sa iyang nahimutangan ug midayal sa pito ka numero sa buhatan nila ni Patrick.

Ang company operator maoy nakatubag sa iyang tawag. Dihang iyang giingnan nga si Patrick Arcanghel ang iyang tuyo, gisultihan siya sa operator nga wala na si Patrick sa opisina niini. Matud pa sa operator, sayong migawas sa opisina si Patrick. Mibatig kahisagmuyo si Urielle.

Gibutang ni Urielle ang awditibo sa telepono nga gisaog ang hunahuna sa kalibog. Matud ni Patrick kaganina sa dayon niining lakaw, dili kini makapauli og sayo kay may daghan kining atimanon nga mga papeles sa buhatan niini. Apan nganong wala na man si Patrick sa opisina niini? Namakak diay si Patrick kaniya? Ug hain man kaha diay si Patrick karon?

Gihulatan gayod ni Urielle ang paghiuli ni Patrick. Diha ra siya sa sala. Wala siya batiag duka kay nahasol ang iyang hunahuna. Dili siya makatulog samtang dili pa mahiuli si Patrick. -- Sumpayan pa