Uhaw sa karinyo

Gula 3

Nagpadayon ang pagbaslanay og text messages nila ni Ricardo ug sa batan-ong byuda nga si Leny. Gibulatikan na usab ni Ricardo ang byuda. “Sukad ko nakakita nimo Len, wala na ko’y tarung kinatulgan, sige lang ko’g huna-huna nimo.”

“Hehehehe! Bulatik! Estoryahe!,” mao ray mubo kaayo nga reply ni Leny. Miinom og tubig si Ricardo kay paminaw niya mibukal ang iyang dugo tungod kay hilabihan ang kalipay niya nga mi-communicate niya si Leny. Mora’g may pagbati siya sa byuda.

Wala pa gani makahuman og inom sa tubig si Ricardo mitingog na usab ang message alert sa iyang cellphone. Gikan gihapon ni Leny ang message. “Karong Domingo moadto ko sa menteryo, kita ta didto. Unya kuyog ta kay mag-night swimming mi ug ang akong mga amiga.”

Nakalitan si Ricardo kay wala siya magtuo nga dapiton siya ni Leny og night swimming. Gibawsan dayon niya ang text. “Dili ka mauwaw nako sa imong mga barkada? Bati ra ba ko’g dagway.”

Nagpaukon-ukon pa kunohay si Ricardo aron ingnon nga wala siya’y gusto apan naglumpayat sa kalipay ang kasingkasing nga giimbitar siya og pangaligo.

“Wala man gud ko’y partner Rick kay patay na man ang akong bana unya ang akong mga barkada duna. Mingaw kaayo mao nga imbitahon tika,” pasabut ni Leny kang Ricardo.

Ang bawos-bawos nila nga text messages maoy nakapahimo kanila nga suod. Naghinam-hinam na g’yud si Ricardo. Kun mahimo pa lang, tabangan niya ang pagligid sa panahon aron muabot na ang adlaw’ng Domingo.

Pagka Domingo, giandam na ni Ricardo ang mga gamit sa pagpangaligo. Gisulod niya og gamay’ng bag. Sa wala pa siya molakaw, gisud-ong usa niya ang iyang kaugalingon sa salamin.

Gikuha niya ang perfume nga diha sa kilid ug gipasirit sa iyang kwelyo sa T-shirt ug sa ilokan nga bahin. Gusto ni Ricardo nga humot ug presentable kaayo siya sa ilang panagkita karon ni Leny.

Una si Ricardo nga miabot sa menteryo. Midiritso siya sa lubong sa iyang Mama. Nangadye ug taud-taud miadto sa lubong sa bana ni Leny.

Nagkitab-kitab ang iyang baba. May gisulti ngadto sa lubong ug wala gani makabantay nga nagkaduol na kaniya si Leny.

Pwerteng kuganga ni Ricardo dihang kalit lang mitingog si Leny sa iyang luyo. “Unsa nay gikitab-kitab sa imong baba Rick?” pakisayud ni Leny.

Nagngisi si Ricardo nga miatubang ni Leny. “Gipangayo lang nako sa imong namatay’ng bana nga tabangan ko niya nga sugton unta ko sa babaye nga iyang gimahal.” (Sumpayan)