Sugilanon - Imo na ang akong uyab, Manoy

Lipata, Minglanilla, Cebu

Miabot si Alex gikan sa Manila sa iyang pagtrabaho didto. Og tungod sa kahinangop nga sulod sa napulo ka tuig, karon pa siya nakauli, misuroy dayon siya sa siyudad sa Cebu.

 "Opps!" Iyang gikabangga ang usa ka babaye nga maayong pagka-tumba. "Sorry kaayo, Ma'am, wa gyud nako tuyoa," iya dayon gitabangan pagpatindog ang babaye.

"Okey lang sir, naglingi man sab god ko," dayong pamunit niini sa nagpasad niyang kinomprang groceries. Gitabangan dayon kini ni Alex.

"Sige lang, ma'am kay akong ilisan nang mga nadaot."

"Wa may naunsa ini sir, salamat lang hinuon sa imong pagtabang."

"Ako diay si Alex Vergel, ma'am. Mahimo bang mahibaloan ko ang imong ngalan?"

"Ako si Linda, Erlinda Marzan."

Ingon niadto ang ilang panagkaila ug nianang gabhiona, bisita ni Linda si Alex sa ilang balay sa Mabolo. Sama na sila sa dugay nang managkaila. "Alex," matud ni Linda, "pili-an ka tingali kay miabot ka man og 35 nga ulitawo pa gihapon."

"Abi nimo, Linda, pito kaming magsuon, pulos lalaki ug ako ang kamagulangan. Tulo nako ka manghod ang akong gigastohan aron makatapos ug karon pulos na sila propesyonal. Mao kana ang hinungdan nga hangtod karon ulitawo pa gihapon ako. Pero karon nga nakita ko na ang babaye nga akong pakaslan, kun mosugot ka, mamalaye ako dayon."

"Kusoga sab nimo, Lex, oy, bag-o pa gani tang nagkaila."

"Maghinayhinay diay ko, nga dugay na ra ba 'kong nabiyaan?"

"Bitaw,Lex, I like your style, lahi kaayo ka sa akong uyab. Bisan pa niana, hatagi pa ako og diyutay'ng panahon."

Nianang sunod nga gabii, bisita ni Linda ang iyang uyab nga si Fredo. "Linda, nia na gikan sa Manila ang akong maguwang nga si Alex. Ako unya siyang ipailaila nimo kay buotan ra ba kaayo nang tawhana."

"Alex? Unsa may apelyedo?"

"Vergel. Alex Vergel. Nakaila ka diay ni Noy Alex?"

"Nganong di man makaila, nga nangulitawo man na nako. Gihagad man gani ko'g kasal. Pero nganong lahi man ang inyong apelyedo?"

"Anak na siya sa unang bana sa akong inahan nga biyuda ug diyes anyos na siya sa pagkaminyo ni papa ug mama. Ug pagkamatay ni papa, siya na ang migasto namong tanan aron kami mabuhi ug maka-eskuwela. Bisan dugay na kitang manag-uyab, pero akong ikalipay kun siya ang imong mabana. Sugta siya, Linda, alang nako, ako kanang hangyo."

Nalipay usab si Linda sa iyang nadungog sanglit nakabaton nag tipik sa iyang kasingkasing ang ulitawong guwang.

Duha ka adlaw ang milabay. "Uyab diay na nimo si Linda, Fredo? Sus, pasayloa ko kay wa ko masayud."

"Ayaw kaguol niana, Manoy, kay malipayon kong ihalad kanimo ang akong uyab. Imo na siya Manoy." (Katapusan)