GULA 163
Si Carlo hilom nga naniid sa mga tawo nga nagsulod-gawas sa balay. Gisul-ob niya ang iyang x-ray eyeglasses ug gisuhid ang mga tawo nga nagpulipuli’g tan-aw sa haya ni Tiya Marta. Wala sila’y kasayoran nga hingpit silang hubo sa panan-aw sa sekreta kay molapos man ang iyang tinan-awan sa gisul-ob nilang sapot gumikan sa kahait sa x-ray eyeglasses. Wala siya’y daotang tumong sa paghimo sa ingon. Hinunoa, namasin siya nga may makita siyang sakop sa kulto nga mitambong sa haya. Mailhan niya kini kun makita niya ang patik nga 666 sa bukobuko niini.
Apan wala siya’y nakitang mga sakop sa kulto nga mitan-aw sa haya sa iyang iyaan. Wala gayoy usa kanila nga mipatim-aw sa panimalay sa nagbangutan nga pamilya sa mga Escobar.
Gitangtang na lang ni Carlo ang x-ray eyeglasses gikan sa iyang mga mata. Nausa ang iyang pagtuo nga walay mga sakop sa kulto nga nagtinguha sa panimalay sa mga Escobar. Naglikay sila nga masakpan, maoy iyang katahap.
Paglingay sa adlaw sa kaudtohon, nahiabot si Padre Daniel, ang kura paruko sa parokya sa Mabini, kuyog sa usa ka sinaligan. Ang pari mitunol sa mga pahasubo niini ngadto sa nagbangutan nga mga hingtungdan sa namatay. Mihatag kinig mga pulong sa pagdasig sa mga tagtungod sa tinguha nga madawat nila ang kamatuoran nga patay na si Marta.
Si Carlo ang unang gipakigsultihan ni Padre Daniel. Mipahasubo usab kini kaniya. Dugaydugay ang ilang panagkabildo. Nahisgotan ni Padre Daniel ngadto kaniya nga nakapangompisal diay ang iyang iyaan ngadto sa pari sa wala pa kini dagita sa mga sakop sa kulto.
Igo lang nakabiya si Padre Daniel, nahabanos sa pag-abot si Maj. Dick Campo. Mitunol usab ang hepe og mga pahasubo ngadto sa mga hingtungdan sa gipatay. Miduyog kini sa kasub-anan sa pamilya nga nahitaboan.
Daklit nga nagkasulti sila si Carlo ug Maj. Campo. Nahisagmuyo ang sekreta sa gitaho sa hepe nga wala pa gyu’y development ang gipahigayon nga 24-hour operations sa kapolisan sa pagpangita sa mga sakop sa kulto. -- Sumpayan pa