Si Maria ug si Ricardo

Sa pangidaron nga 30-anyos nagpabilin gihapong ulitawo si Ricardo Valencia. Usa siya ka tagasibya og balita sa telebisyon. Si Ricardo may gitas-on nga 5’8, guwapo ug maayo modala sa iyang postura. Apan ang kahibulongan sa tanan nganong sa maong pangidaron wala paman gihapon kini makakaplag og kapikas sa kasingkasing.

“Pre molapas nalang ang akong edad ning kalendaryo apan wala pa gihapon ako mamenyo! Unsa may anaa kaninyo nga wala kanako.” Pangutana sa maong ulitawo.

Aysus pre! Ayaw pagkabalaka anang butanga moabot ra gihapon kana sa imong kinabuhi sa saktong panahon. Unsaon ka man sad gud, pilian ka man sab kaayo. Kung ako kanimo Pre, mag-unwind sa ko. Kana bang magbakasyon sa layong dapit aron malingaw usab. Wala ta nakahibawo sa imong paglingawlingaw didto makaplagan mo ang imong mahimong kapikas.

Mibakasyon gayod si Ricardo ngadto sa probinsiyang iyang natawhan. Wala niya usiki ang panahon. Gisuroy niya ang maong dapit. Nakakita siya og usa ka maanindot nga sapa, mipungko siya sa dakong bato daw gipiyong ang duha ka mata. Sa paglabay sa pipila ka gutlo iya kining gibuka ug nakita niya ang usa ka maanyag nga bayhon nga milangoy-langoy.

Puti ug hamis ang pamanit niini, pulahon ang ngabil, tuy-od ang maanindot ug tagahawak nga buhok. Nabatyagan niya kining tanan sa dihang mihaw-as ang maong dalaga sa sapa.

“Miss ganiha ka pa ba?” Pangutana ni Ricardo sa maong babaye.

“Ako ang angay mangutana niana kay wala pa ikaw dinhi samtang ako milangoy-langoy dinhing dapita,” tubag sa dalaga.

“Pasensya na Miss wala ko man gud ikaw igkita ganiha nga milangoy ning sapa,” ingon si Ricardo.

“Walay problema kana kanako yuna ra, dili ka taga dinhi di ba? Karon ko lang ikaw igkita ning lugara. Nganong nahiabot ka man ning dapita nga nag-inusara?”

“Sa tinud-anay lang nga pagkasulti, natawo ako ning lugara ug karon lamang ako mibalik ning dapita aron malingaw nako ang akong kaugalingon,” tubag ni Ricardo.

“Sa tuno sa imong sinultihan mora’g aduna kay dakong problema sa imong kinabuhi, pwede mo ba kanang masulti kanako, andam akong maminaw aron usab magaan-gaan ang imong pamati, o diay ako si Maria,” ingon pa ni Maria.

“Salamat Maria, ako pud diay si Ricardo, ambot lang, wala ako nakasabot sa akong kaugalingon, pirte mang haw-anga. Hangtod karon sa akong pangidaron nga 30 wala pa man gihapon ako mamenyo. Magpabilin ba kaha akong ulitawong guwang niini nga dili man lang makakita sa akong liwat, wala ba ako’y katungod nga malipay?” saysay pa ni Ricardo.

“Nakasabot ako sa imong gusto ug gipasabot Ricardo apan ayaw pagkawagtang og paglaom, wala kita makahibalo kung unsay plano sa kahitas-an sa matag-usa kanato. Timan-i anaa ang Ginoo nga mogiya kanato sa angay natong buhaton,” tubag ni Maria kang Ricardo nga gigunitan niya ang kamot sa maong ulitawo.

Gitutokan ni Ricardo ang maong dalaga ug naengganyo siyang hagkan ang mga ngabil niini. Mitan-aw si Maria kaniya pagkahuman sa maong hitabo daw midagan pahilayo.

Milabay ang duha ka adlaw, wala gayod mahimutang si Ricardo kabahin sa iyang gibuhat, iyang gibalik ang maong sapa ug namasin nga makita pa niya si Maria sa maong lugar pag-usab aron makapangayo siya og pasaylo. Ug sa wala damha, nagkakita gayod sila sa maong dalaga. Gisulti niya ang tinuod niyang gibati alang niini bisan sa makadiyot lang nga panahon.

“Maria pasayloa ako sa akong nabuhat diha kanimo sa milabay’ng adlaw apan gusto kong mahibaw ka sa tinuod kung gibati, gihigugma ko ikaw bisan sa kalagyo sa agwat sa atong edad Maria,” matud pa ni Ricardo.

“Bisan man gani ako Ricardo mao pud ang akong gibati alang kanimo apan dili mahimo nga mag-uban kita kay dili kita parehas og kalibutan. Gikinahanglan nga may usa kanato ang angay mosakripisyo. Dili ako susama sa usa ka tawo Ricardo, usa ako ka engkanto ug andam ka bang mokuyog sa akong kalibutan nga kalimtan mo ang tanan bahin ning kalibutana kung diin ka nagtubo?” “Ako si Maria ang engkanto sa sapa, Ricardo.” (Kataposan)