Hinog sa punoan

Gula 80

“Kun gutomon ka na, una lang og panihapon. Ayaw na lang ko paabota.”

Mitando siya. Ug nakalitan siya dihang kalit lang gihagkan ni Patrick ang iyang aping. Dayon nanamilit kini kaniya.

Taudtaod nang nakabiya si Patrick paingon sa trabaho. Si Urielle naglingkod sa sala nga naghinuktok. Matag karon ug unya hikapon niya ang iyang aping nga gihagkan ni Patrick kaganina. Unya piyongon niya ang iyang mga mata samtang mangumbitay sa iyang mga ngabil ang matagbawon nga pahiyom. Wala siya makasabot sa iyang kaugalingon kun nganong mibati siya’g kalipay nga gihagkan siya ni Patrick.

Ikaduha pa lang kining higayon nga nahagkan siya ni Patrick. Ang una nahitabo sa panahon nga gikasal sila. Apan wala niya mabatyagi ang kainit sa halok ni Patrick niadtong higayona. Lahi sa paghalok ni Patrick kaniya kaganina nga bisan sa kakalit apan nabatyagan niya ang kainit ug kalalim niini.

Unsa man kahay buot ipasabot sa paghalok ni Patrick kaniya? Nakasukot siya sa iyang kaugalingon. Timaan na kaha kadto nga nahigugma na si Patrick kaniya? Dili kaha nga gihagkan siya niini agi’g pasalamat tungod kay nakagusto kini sa giluto niyang pamahaw? -- Sumpayan pa