Gula 79
Paggawas ni Patrick gikan sa kuwarto, andam na ang lamesa. Nakailis na usab si Patrick ug andam na kining molakaw paingon sa trabaho human sa pamahaw.
“May kaliwat ka ba og chef?” Sukit ni Patrick samtang nangaon sila.
“Wa man,” tubag ni Urielle. “Ngano man diay?”
“Lamian man gud kaayo ang imong mga linuto. Nakuha sab nimo ang akong taste ug ingon man ang paborito kong mga pagkaon.”
Igo lang mipahiyom si Urielle. Gibati niya ang kalipay sa nindot nga komento ni Patrick mahitungod sa giluto niyang pamahaw. Wala siya magdahom nga paborito diay ni Patrick ang giluto niyang mga pagkaon.
“Sagdi lang,” ni Patrick pa. “Sa sunod, ako na sab ang magluto sa paborito mong pagkaon.”
“Nasayod ka ba diay kun unsay paborito kong mga pagkaon?”
“Wala. Pero ako lang tagnaon.”
Nahikatawa si Urielle.
“Dili tingali ko makapauli unyag sayo,” matud ni Patrick dihang nahuman na ang ilang pangaon.
“Ngano man?” Pakisayod ni Urielle.
“Daghan kaayo ko’g atimanon sa opisina. Nagtipun-og na ang mga papeles sa akong lamesa nga nagkinahanglan sa akong pagtagad.”
“Mao ba?” -- Sumpayan pa