Ang Penpal Ni Gilda

Mahilig sa sinulatay si Gilda sukad pa niadtong nagtungha pa siya sa high school. Apan, mao lagi kana nga dunay iyang pen pal nga mga lalaki ug babaye; ang uban matarong ug ang uban tinuod gayod nga makighigala.

Ug usa sa iyang mga pen pal mao si Ericson Hansen usa ka taga Holland nga matud pa niini, kadaghan na siya nakabiyahe sa Pilipinas.

"I have gone to your place many times," matud ni Ericson pinaagi sa text sa larino nga sinultihan nga English. "I enjoyed with my Filipino friends in Boracay. But I have not found a special friend. Now, because of you, I plan to travel in your country. I hope when we see each other, something very special will happen to us."

"I will wait for you this coming March 15, 2010," matud ni Gilda ngadto kang Ericson. "I hope you can be my special guest during my birthday celebration."

Gituman ni Ericson ang iyang gisulti kang Gilda. Nalipay kaayo si Gilda dihang nakadawat siya sa tawag ni Ericson nga nagpahibalo nga tabuon siya sa airport sa Cagayan de Oro.

Hinuon, walay problema ang kaugalingon ni Gilda kay ang tanan andam na alang sa pag-abot sa iyang pen pal nga Holander. Ang tinuod usab, sukad mahimong pen pal ni Gilda si Ericson, gibali walay nada kadtong unang pen pal kay ang tanan niyang hunahuna adto na mahipunting kang Ericson. Mipasalig man god siya sa pen pal nga serious siya niini.

"I promise, I'll be serious to you," kausa pasalig niya niini.

Malipayon si Gilda nga midawat kang Ericson sa ilang panimalay. Daghan sa iyang mga silingan ang nakaingon nga maayong tawo ang higala ni Gilda kay bisan kun usa kini ka langyaw, madali kining nakigsandurot sa mga silingan nila.

Unya pipila lang ka adlaw sa pag-abot ni Ericson, nasayran niya nga duna na diay anak si Gilda nga ang ngalan si Susan. Maanyag si Susan. Gawas pa, usa ka dalagita ug nagtungha sa ika duhang ang-ang sa high school.

Dinhi natandog ang atensiyon ni Ericson. Gibati og kaibog ang langyaw kang Susan. Busa, pila ka semana sukad sa pag-abot ni Ericson, prangka kining misulti ngadto kang Gilda.

"Gilda, let us be friends forever and if you will agree, bring your daughter Susan to Holland and let her continue her studies there. I will make her my adopted child," mabugnaw'ng pulong ni Ericson.

Namatikdan man god ni Gilda nga dihang nakita niini si Susan ingon og nabalhin ang atensiyon niini kang Susan. Diha pay mga higayon nga gikuhaan niinig hulagway si Susan ug matud pa niini nga iyang ipadala ngadto sa iyang mga ginikanan sa Holland.

"What can be my advantage if that will happen?" paglinaw ni Gilda ngadto kang Ericson. "It is not easy to lose a daughter like Susan."

"Don't you worry, if you will agree, I will prepare your papers together with Susan so that you can accompany her to Holland. This coming closing in your school, we will all go to Holland. I will shoulder all the expenses. After that you can act as a tourist in Holland and at any time you can visit Susan in Holland."

Nalimtan kadtong pangandoy ni Gilda alang kang Ericson. Masadya tuod ang iyang adlaw'ng natawhan tungod kay diha si Ericson apan ang maong kalipay nahulipan pinaagi sa iyang anak nga si Susan. Hinuon, pag-abot sa pagsira sa klase, matuman usab ang iyang pangandoy nga makabiyahe sa gawas.

Nalipay gayod siya kay morag tinud-anay ang gisulti ni Ericson nga ikuyog siya niini pag-adto sa Holland kay ang tanang papeles giandam naman ni Ericson para sa ilang pagbiyahe paingon sa Holland karong pagsira sa klase.

Daghan sa mga higala ni Gilda ang nag-ingon nga masuwerte si Gilda sa iyang pakigpen pal sa gawas kay pinaagi niini, mahatagan ang iyang kaugalingon nga makaadto sa laing nasud sama sa Holland. (Kataposan)