Anino sa kulto

Gula 160

Apan kapakyas ang ilang naani. Wala sila’y nahimo sa masubsob nilang pagsudlay sa tanang dapit sa lungsod sa Mabini nga ilang gituohan nga posibleng gilubloban sa mga sakop sa kulto. Hugot ang pagtuo ni Carlo nga sekreto gayod kaayo ang dapit nga gidad-an sa mga Tambayawan sa iyang iyaan ug lisod kining matultolan sa kapolisan.

Si Carlo nabalaka na pag-ayo. Ingon sa napaghilantawan na niya kun unsay posibleng mahitabo kun dili gayod makaplagan ang iyang iyaan. Nakaseguro siya nga ang iyang iyaan mahiagom gayod sa kabangis sa mga disipulo sa Tambayawan.

Ug wala gayod masayop si Carlo, nahitabo ang gikahadlokan niyang mahitabo. Nianang hapon sa adlaw’ng Huwebes, samtang nagsultihanay sila si Maj. Campo sulod sa buhatan sa hepe, kalit mibagting ang telepono sa ibabaw sa lamesa niini. Gipakigsultihan sa hepe ang nanawag. Human sa ilang panagsulti, milabhag ang kasubo sa nawong niini nga miatubang kaniya. Nakit-an na nila ni Lt. Valera ang imong iyaan...apan usa na ka patay!

Mora’g nalipong si Carlo sa maong kasayoran pagkadungog niya niini.

“D-diin man kuno nila makit-i ang patay’ng lawas ni Tiya, Dick?” pangutana ni Carlo nga nagluha ang mga mata. “Sa beach resort sa barangay Marcelo,” maoy tubag.

Nagdali sila pag-adto sa nahisgotang dapit. Ang sakyanan ni Maj. Campo maoy ilang gisakyan. Ang awto ni Carlo gibilin lang sa kuwerpo. Maoy ilang naabtan sa dapit ang bagang duot sa katawhan nga sama sa buot mosaksi og pasundayag. Naghuot. Nagpunsisok. Midali sila pagpanganaog sa sakyanan ug miliutliot sa daghang mga tawo aron makaabot sa nahimutangan sa patay’ng lawas nga nakaplagan.

Napahimutang na ang patay’ng lawas ni Tiya Marta sa stretcher. Daw gikusi ang kasingkasing ni Carlo sa iyang nakita. Daghang bun-og ang nawong sa iyang iyaan. May mga samad kini sa lainlaing parte sa lawas. May baraw nga nagtaop sa dughan niini. Misantop gilayon sa hunahuna ni Carlo nga gipaantos una ang iyang iyaan sa wala pa kini patya sa mga sakop sa kulto. -- Sumpayan pa