Sukad pa's pagbuhat sa kalibutan

Nagpakuyog si Noel Penaflor sa Correctional Guard nga si Rel Becalas sulod sa BJMP sa lungsod sa Gimbiano. Moduaw si Noel sa binilanggo nga si Ritche Tibon nga dad-onon na sa Muntinlupa. Konbiktado na si Ritche sa salang pagpatay.

Bayente anyos iyang sentensiya. Ug may dugang pang napulo ka tuig kay may una siyang salaod nga frustrated murder, unya nipuga. Nadakpan lang siya tungod sa iyang ikaduhang krimen.

Dili isip higala ang pagduaw ni Noel sa priso karong hapona. Duna lang siya’y gustong masayran. May mahinungdanon siyang ipangutana sa piniriso. Kay ang iyang biktima manghod ni Noel nga si Michael. Kamanghuran sa tulo ka managsoon. Si Noel ang panganay. Nagtupad og lakaw karong hapona sila si Noel ug Rel sa koridor sulod sa bilanggoan. Si Rel naa sa wala ni Noel.

Nikabat og lima ka tuig sukad sa hitabo una nakonbikto si Ritche. Duha ka tuig ang nilabay una siya nadakpan. Tulo ka tuig ang kombate sa husgado pagpangita’g hustisya.

Duha silang managhigala nga puro panday ang nagkuyog panahon sa hitabo. Gipatrabaho sila sa gi-renovate nga balay sa managtiayong Byron-Norelyn sa baryo Huyab. Nahimutang ang panimalay sa awaaw nga lugar. Apan daghang mangagi sa duol nga mag-jogging o mag-hike mabuntag ug hapon kay may dakong wanang sa bakanteng yuta ibabaw og diyutay sa balay.

Anha kasagaran mag-jogging si Michael sa bungtod sa Huyab. Ang ilang balay nahimutang sa silingang baryo sa Imle. Disisete iyang edad. Estudyante sa Accountancy. Buntag hapon siya tig-jogging. Adtong higayona, namanday na si Ritche ug iyang kauban nga si Roy Zapanta.

Usa ka hapon, wa nahiuli si Michael gikang nag-jogging. Unya duha ka barangay tanod ang nipahibawo sa hitabo sa mga ginikanan ni Michael. Sila si Wilben Duhig ug Fernando Lapaz. Sila ang nakabangal sa patay'ng lawas ni Michael sa kasagbutan. May agi sa dinunggaban sa bukobuko.

Nahibulong lang ang managtiayong Byron-Norelyn nga nagdali og biya ang mga panday. Wa nitiwas sa trabaho. Nikobra lag gamay nga suhol.

Pagkahitabo sa krimen, didto sa Saudi Arabia si Noel. Nagtrabaho isip Project Engineer sa mga proyekto sa usa ka adunahang Arabo. Siya ang nigasto sa pagpangita sa mga suspek. Sa pagdinali nga makasibat, ang gabas ni Roy nahibilin sa ilang gitrabahoan. May ngalan ug address niya ang nasipra sa gabas. Natultulan siya’s kapolisan ug giimbistigar. Ug nisuka nga si Ritche ang nagdunggab ni Michael. Nagsuhol si Noel og banggiitang abogado aron maseguro nga makonbikto gyud ang mamumuno. Unya, nibakasyon si Noel aron makigkita sa kriminal.

"Mao ni ang selda ni Ritche Tibon!" ni Rel nga nihunong og lakaw ug nitudlo sa selda sa iyang wala. Usa ka tawo lang ang naa sa sulod. Naghigda sa lantay nga puthaw. "Ritche Tibon! Bangon! May dalaw ka!" ni Rel sa kusog nga tingog.

Nibangon og dali si Ritche. Nilingkod sa lantay. Nanglugod sa mata aron ingnon nga natulog. Nitindog siya. Nilakang paduol sa pultahan. Abi’g ablihan. "Ikaw si Ritche Tibon?" ni Noel. "O, ako sir. Ngano man unta?" niya pa."Ako si Noel Penaflor. Maguwang ni Michael kadtong imong gidunggab. Duna lang koy gustong masayran" ni Noel. Bug-at iyang galamhan nga nakighinabi sa nagpatay sa iyang igsoon. "Unsa man unta?" ni Ritche. "Nganong gipatay man nimo akong manghod?" ni Noel. Daw kahilakon ang tono.

Dugay nakatingog si Ritche. Nitan-aw sa guwardiya. Nitan-aw ni Noel. Nihangad.Unya niduko. "Nasuya lang ko niya!" ni Ritche sa malumong pulong. Nitalikod. Nibalik sa iyang lantay. Daw naulaw sa iyang tubag. Napatiurok og dugay si Noel. Niginhawa’g lawom.

"Makapatay gyud diay ang kasuya. Sukad pa sa pagbuhat sa kalibutan. Managsoon pa gani to si Abel ug Cain" ni Rel. "Salamat, guard. Adto na ko" ni Noel nga nilamano sa guwardiya. Giagwanta niyang kahang sa iyang mga mata samtang naglakaw padulong sa gawas. (Kataposan) (Alang sa magbabasa nga gusto’g libreng konsulta, dad-a lang ning pahina sa opisina sa tagsulat. Iatol og Sabado)