Gula 77
Wala motingog si Urielle. Gipamalandongan niya ang gisulti ni Patrick.
“Ikaw ang akong gikaluy-an,” ni Patrick pa.
“Nganong naluoy ka man nako?” Pakitubod ni Urielle.
“Basin nagtuo ka nga ikaw ang gihimong pangbayad sa utang sa imong mga ginikanan ngadto ni Daddy. Dili kana ang tumong sa akong amahan. Bisan ako supak niini sa sinugdanan. Pero inanay kong nakatugkad nga dili daotan ang iyang tumong. Nahiatol lang tingali nga gusto kaayo ni Daddy nga ikaw ang akong mapangasawa ug nakautang sab ang imong mga ginikanan kaniya, mao nga ingon niini ang nahitabo kanato. Pero para nako, coincidence lang kadtong tanan.”
“Nakadawat na ko sa kamatuoran.”
“Nga unsa?”
“Nga bana ko na ikaw.”
“Ako sab, nakadawat na sa kamatuoran...nga ikaw na ang akong Honey.”
Honey? Buot bang ipasabot nga nahigugma na si Patrick kaniya? Kini unta ang gustong klarohon ni Urielle. Wala man gud siya makaseguro kun unsa gayod ang matuod nga pagbati ni Patrick alang kaniya karon nga magtiayon na sila. Tinuod, kanunay kining magpadala kaniya’g sweet text messages sa cellphone. Kun magkasulti sab sila, romantiko kaayo’g sinultihan si Patrick. Pero wala gayod kini direktang gipadayag nga nahigugma kini kaniya. -- Sumpayan pa