GULA 159
“Sir,” sa polis pa ngadto sa hepe. “Clear na ang area.”
“Ikarga ninyo ang mga patay’ng lawas sa sakyanan,” mando sa hepe.
Mikiros ang mga polis pagtuman sa gimando sa hepe.
“Angay kang mag-amping, Carlo,” nagkanayon si Maj. Campo. “Nagtuo ko nga tungod niining hitaboa, mosamot ang kaligutgot sa mga sakop sa kulto kanimo.”
Ang pahimangno ni Maj. Campo sama sa basal sa agong nga milagingling sa alimpatakan ni Carlo Guieb, mikanay. Alang kaniya, kadto maoy tambag ug pahimatngon sa usa ka matuod nga higala ug kauban sa buhat. Bisan kun siya nahisakop sa usa ka pribadong ahensiya sa paniktik ug si Maj. Campo sakop sa PNP apan alang kaniya, managsama ra ang ilang kaakohan: ang paghatag og seguridad sa katawhan ug ang pagpalungtad sa hustisya ug katarongan diha sa katilingban.
“Ikaw sab, Dick,” mibalos si Carlo pagpahimangno sa hepe. “Angay ka usab nga magbantay. Lakip ka nameligro sa mga disipulo sa kulto.”
Pahiyom ray gisukli sa hepe sa iyang gisulti.
Alang kang Carlo, ang gipakitang reaksiyon sa hepe sa iyang gisulti nagpasabot nga wala kini mabalaka ug wala matay-og sa kahadlok sa mga sakop sa kulto. Niini, hilom siyang nakadayeg sa hepe. Naghupot gyud kini’g igong kaisog!
“Mokuyog ka ba namo ngadto sa kuwerpo?” Gipangutana siya sa hepe dihang nahuman nag hipos sa mga sakop niini ang mga patay’ng lawas sa mga sakop sa kulto nga iyang gikasangka.
“Mohapit ko didto,” maoy iyang tubag. “Pero dili ko magdugay, Dick. Motabang ko’g pangita kang Tiya Marta. Nabalaka ko nga may daotang buhaton ang mga Tambayawan kaniya.”
“Ikaw ang mag-igo, Carlo,” sa hepe.
Gihingusgan gayod sa kapolisan ang pagpangita kang Marta, ang iyaan ni Carlo nga gituohang gidagit sa mga sakop sa Tambayawan Black Brotherhood. Adlaw ug gabii nga nagpahigayon sila’g operasyon sa pagpangita sa gidagit. Miabag si Carlo sa mga tinugyanan sa balaod. Halos wala sila’y pahulay sa tinguha nga maluwas ang gidagit sa mga sakop sa kulto. -- Sumpayan pa