Hinog sa punoan

“Aw, u-unsa man diay?”

“Silang tanan nangutana kun nagsabak na ba ko.”

Nahikatawa si Patrick. “Sa kadaghan sa mahimo nilang ipangutana, kana ra gyud nga pangutana ang ilang gikasukot kanimo?”

“Ambot bitaw,” ni Urielle pa. “Mora ma’g excited kaayo silang makakita sa atong liwat.”

“Sagdi lang na sila, uy,” ni Patrick. “Ginindotan lang na sila sa atong kombinasyon.”

Wala motubay si Urielle sa gisulti ni Patrick.

“Tuod diay,” ni Patrick pa pagkilab sa pipila ka daklit.

“Ngano man?” Sukit ni Urielle.

“May balita ka pa ba mahitungod niadtong imong boyfriend?”

“Si Nelson?”

“Oo. Kumosta na siya?”

“Minyo na kuno, gikasal sa miaging buwan.”

“Gisakitan ka ba?”

“Wa man. Nganong sakitan man ko nga mas una man kong nagminyo kay kaniya?”

“Sorry, ha.” “Sa unsa?” “Tungod sa kagustohan ni Daddy, nasakripisyo ang imong gugma, ang gugma ninyo ni Nelson.” -- Sumpayan pa

Anino sa Kulto

Ni Rosalie Vallecera

Gitutokan ni Carlo ang kaaway nga nagkulob sa salog. Apan nahaigking siya, Kalit milagubo ug naabli ang pultahan sa duha ka lawak sa balay. Sa iyang paglingi, maoy nasabak sa iyang panan-aw ang duha ka kaaway nga migawas. Ulahi na aron iyang gamiton ang iyang armas. Busa ang iyang nahimo, miligid na lang siya sa salog nga semento paingon sa kosina aron paglikay sa nagpungasing mga bala nga gipaulan sa mga kaaway.

Apan gisundan gayod siya sa mga kaaway. Wala siya lung-i sa pagpusil samtang nagligid. Gihanginhanginan na ang iyang mga dalunggan sa naghagiyos nga mga bala. Nagpadayon gayod siya pagligid hangtod nga nasalipdan siya sa dakong divider nga hinimo sa kahoy.

Dinhi ingon sa kalit lang mibalit-ad ang kahigayonan ug mipabor kaniya kay dihang nabantang na sukad sa iyang gihup-an ang mga kaaway nga nagtinguha sa iyang kaalaotan, siya na usab ang mibalos pagpaulan og mga bala. Nasapon gilayon ang usa ka kaaway sa mga bala sa iyang Uzi. Apan ang kauban niini ingon sa wala pa kahutdi sa hingpit sa suwerte. Dali kining nakasibog ug midagan ngadto sa sala.

Apan nahinayak na ang buot ni Carlo. Midali siya pag-agpas sa kaaway nga ingon sa nagtinguha sa pag-ikyas. Wala na kini hatagi’g higayon ni Carlo. Dihang hapit na makaabot ang kaaway sa pultahan, iya kining gipabuthan. Ang duha ka bala nga gibuga sa iyang Uzi nakaigo sa lawas niini. Nahagba ang kaaway sa salog ug naligo sa kaugalingong dugo.

Miusa pagkahilom ang palibot. Gitagsatagsa ni Carlo pagtangtang ang maskara sa mga kaaway ug gihiling niya ang ilang mga bukobuko. Ug nasuta niya ang matuod. Mga sakop sa kulto ang tulo. Pulos sila may patik nga 666 sa bukobuko.

Kadali rang nakahukom si Carlo sa sunod niyang buhaton. Dihadiha gikuha niya ang cellphone gikan sa bolsa sa iyang diyaket. Gikontak niya si Maj. Campo. Wala dangtig dugay, nabati niya ang tingog sa hepe. Gisuginlan dayon niya kini sa nahitabo. Nakugang pag-ayo ang hepe sa iyang giasoy. -- Sumpayan pa