Anino sa kulto

Gula 156

“Magamit mo kana kun may mga panghitabo nga dili damhon,” niya pa. Mibiya dayon si Carlo human niya kabinlig instruksiyon ang mga tawo sa balay. Hapit na mag-ikatulo ang takna sa kahaponon. Nakahunahuna siya nga mohapit una sa iyang gipuy-an sa dili pa molahos sa buhatan sa kapolisan aron mag-ilis og sapot. Kagahapon ra siyang wala makailis og sinina ug nanimaho na kini pag-ayong singot. Paghunong sa awto nga iyang gimaneho tungod gayod sa gate nga puthaw sa iyang balay, dihadiha nanaog siya. Maagpason ang iyang mga lakang nga nagpaingon sa gate. Apan nakugang siya. Iyang nasuta nga naabli ang pultahan nga puthaw sa gate. Midasmag kaniya ang kakulba.

Midali siya pagbalik sa nahimutangan sa awto ug gikuha ang Uzi nga gisulod sa knapsak. Mibalik siya sa gate nga nagbitbit na sa kinaham niyang armas. Gihinay niya pagtukmod ang puthaw’ng sera ug misulod. Mainampingon siyang mitadlas sa lagwerta samtang hugot nga nagkupot sa Uzi.

Iyang nasuta nga abiyerto usab ang dakong pultahan sa balay nga maoy agianan paingon sa sala. Naguba ang doorknob niini. Dinhi misamot kalain ang gibati ni Carlo. Misantop sa iyang hunahuna nga may mga tawo nga nakasulod sa iyang balay ug maoy nagguba sa seradora sa pultahan.

Gihinay pagtukmod ni Carlo ang palid sa pultahan nga bisan nagtak-op apan wala nay serado. Miigot ang palid ug hinay nga naabli. Mainampingon siyang misulod. Gikilas niya ang iyang mga mata. Ang iyang dalunggan nagpaningod sa palibot samtang hugot nga naggunit ang iyang tuong kamot sa Uzi. Apan tumang kamingaw ang miabiabi kaniya sa iyang paghimuntog sa sala.

Apan wala gayod mokompiyansa si Carlo. Nagpadayon siyang nagmabinantayon sa iyang mga lihok. Diha na siya sa taliwala sa hawanan sa iyang sala, naglisoliso sa pagwara sa gibitbit niyang Uzi.

Ug sa makausa pa, namatud-an ni Carlo nga ang katuso magpulos gayod alang sa tawo. Kay dihang kalit migawas gikan sa kosina ang usa ka tawong armado ug nagmaskara, siya’y unang nakapabuto. Nakapabuto man tuod kini apan danag na lang sa dayon niining katumba. Ang mga bala nga giluwa sa armas niini didto molapos sa atop nga sin. Ang nagmaskarang kaaway naglunang sa kaugalingon niining dugo. -- Sumpayan pa