Gubot pa sa lukot

Lacaron, San Fernando, Cebu

Congrats ... Miyoy, for a job well done, nga sa kataposan nasulbad ra gihapon nimo, being the number one nga napiling konsehal dinhi ining atong lungsod sa San Fernando! hapit sud-ipi og laway si Mayor Mateo Mondejar. Kinsa ba god ang magdahom nga ang nagkatap nga pagpamaligya sa ginadiling drogas sa shabu ug marijuana sa dakong kasayon imong nadakpan?

Igo lamang nga gipakiwi ni Miyoy, ang iyang ngabil ug gipasundan niya pagpayuhom ang pahiyom diin siya nagkanayon:

"Kutob sa akong mahimo Mayor ... akong buhaton!"

Dili man god ikalimod nga ning ilang balangay ni Miyoy, diin siya magpuyo hilabihan gayod pagkatap sa ginadiling drogas.

Sa iyang pagka-manananggot ning ilang dapit nga sakop sa lungsod sa San Fernando, dali ra nga nabaniog ang ngalan ni Miyoy nga aktibo sa mga kalihokan ilabi na sa pagsumpo sa mga ginadiling bisyo.

"Maayo hinuon Yoy, nga ning atong balangay Kabatbatan ikaw gidayeg sa naghinubra nimong pagpakabana nga kanunay na lang gani ikaw kabuntagan sa pagpauli?" sagol sa pagmahay ang tuno sa sinultihan ni Nisya.

"Sabta intawon ako Nisya nga dili ko mapasagdan ang mga suliran sa katawhan dinhi ning atong dapit." misamot kayambi ang ngabil ni Miyoy nga nangatarongan sa iyang asawa.

Sa kabag-ohay pa god nga nanagtipon nila ni Miyoy ug Nisya isip magtiayon ingon sa napasagdan na niya ang iyang obligasyon isip nga bana sa iyang asawa.

Kahidlaw ug kaluhag ang kanunay nga bation ni Nisya ilabi na nga kanunay na lang siya mag-inusara sa paghigda sa ilang balay.

Wa makasabot si Nisya sa iyang gibati. Gusto siya nga kanunay anaa sa iyang kiliran ang iyang bana nga hugot kaayo nga mogakos. Mas maayo hinuon kadtong wa pa mapili nga Konsehal si Miyoy, kay sal-angan lang ang gabii ... diin magbinuakay silang duha og pakwan.

Kaadlawon nang nahiabot si Miyoy sa ilang balay. Maoy iyang naabtan nga wa nay sanina si Nisya. Nagbilangkad ug gihagawhawan si Miyoy ni Nisya, nga nagkanayon:

"Belib ako nimo Miyoy ... sa pagsulbad og husay sa nagkadaiyang problema ... sulayi kuno og husay kining kasagboton sa akong bilahan?"

Namudlat ang mata ni Miyoy ug nagkanayon:

"Pastilan Nisya ... gubot pa man kana sa lukot!" (Kataposan)