Hinog sa punoan

Gula 72

“Maayo hinuon,” ni Urielle pa. “Aron mahiluna na siya.”

Wala siya sakiti sa kasayoran nga miabot kaniya -- nga minyo na ang iyang hinigugma. Alang kang Urielle, hingpit nang nagbuwag ang mga dalan nila ni Nelson.

Alegre ang pagpahigayon sa ika-61 nga anibersaryo sa kompaniya nga gialagaran ni Patrick isip general manager, ang RGB Resources. Ang tanang mga empleyado gikuyogan gayod sa ilang mga kapikas sa kinabuhi. Nasuta ni Urielle nga kun wala pa niya kuyogi si Patrick, seguradong dili gayod makompleto ang pagtambong sa iyang bana sa maong okasyon.

Maoy unang bahin sa tulumanon ang pagsaulog sa santos nga misa. Gisundan kini sa makabusdik nga pangaon nga gipahigayon samtang nagpadayon usab ang pagpahigayon sa gihan-ay nga tulumanon. Isip general manager sa kompaniya, si Patrick gihatagan og mahinungdanong papel sa tulumanon. Atol sa speech niini, mao gayoy giuna ni Patrick ang pagpaila ni Urielle ngadto sa mga empleyado sa kompaniya.

Ang uban hinuon kanila nakaila nang daan kang Urielle sanglit nakatambong man sila sa dihang gikasal sila si Patrick. Apan may pipila kanila nga wala pa makaila kaniya. Mibati og diyotay’ng kauwaw si Urielle sa dihang gipaila na siya ni Patrick ngadto kanila. Alang kaniya, wala na kadto kinahanglana. Apan ang gibuhat sa iyang bana nakapatambok sa iyang kasingkasing sanglit nagpasabot man kini nga bisan sa iyang kakabos wala siya ikauwaw niini ngadto sa mga tawo.

Namatikdan ni Urielle nga ang tanang mga mata sa mga empleyado didto itumong kaniya. -- Sumpayan pa