GULA 154
Apan nangatarongan si Belen. Niya pa, “wala man tingali ko nameligro, Gaw. Dili man ko sakop sa kulto.”
“Bisan na,” ni Carlo pa. “Dili maayong mokompiyansa ka.”
“Kanus-a lang mahitabo ang pagdagit kang Tiya Marta?” Usisa ni Carlo.
“Kaganinang udto,” tubag ni Belen. “Usa ka kaabag sa simbahan ang mitaho kanamo sa nahitabo. Nakasaksi siya sa pagdagit sa wala mailhing mga tawo kang Mama. Manawag unta ko nimo aron pagpahibalo sa nahitabo apan gipugngan ko ni Papa. Dili siya gustong masayod si Ate Arlin ug maguol sa nahitabo. Nakahukom kaming hulaton na lang ang inyong pagbalik.”
Diha pa untay ipangutana si Carlo kang Belen apan mibagting ang iyang cellphone. Gikuha niya ang kahimanan gikan sa bulsa sa iyang diyaket ug gitamdan ang caller ID niini. Nasuta niya nga si Maj. Campo ang nanawag. Gitubag ni Carlo ang tawag sa hepe.
“Carlo, hain ka karon?” Nangutana gilayon ang hepe. “Dia na ko sa balay sa akong iyaan, Dick,” tubag ni Carlo. “Kun mao, nasayod ka na sa nahitabo?” sa hepe pa.
“Oo, mubong tubag ni Carlo. “Nasayod na ko.”
“Adia pa sa kuwerpo ang imong uyoan ug ang bana sa imong ig-agaw,” taho ni Maj. Campo. “Nabalaka sila pag-ayo sa nahitabo sa imong iyaan.”
“Ingon man usab ako, Dick,” matud ni Carlo.
“Nagtuo ko nga mga sakop sa kulto ang nagdagit kaniya, Carlo,” mipadayag sa hunahuna niini ang hepe.
“Managsama kita’g katahap, Dick,” ni Carlo pa. “Kuyaw gayod kining mga tawhana. Kun mainteres sila sa usa ka tawo, dili gayod nila lung-an hangtod nga mahulog kini sa ilang mga kamot.”
“Kaganina rang milihok ang puwersa sa PNP, Carlo,” matud sa hepe. “Si Lt. Valera ang nangulo kanila. Milihok dayon sila pagkadawat nila sa report. Manghinaot lang kita nga makaani sila’g maayong resulta.”
Wala motingog si Carlo. Nahanduraw niya ang kalisod sa pagpangita sa usa ka gamay nga dagom nga mahulog taliwala sa lapad nga lawod. -- Sumpayan pa