Ang amigo kong barbero

Ang ‘Enoy’s Barbers Shop’ sa poblacion sa lungsod sa Cordova gipanag-iyahan kini ni Mr. Arsenio Limpangog, lumad sa barangay Catarman, sa maong lungsod.

Yano lang si Enoy nga pagka tawo. Sumala pa niya, gamay ra siya og grado. Apan may talento siya sa pagka mag-aawit. Sanglit kinaham niyang kantahon ang mga kinumpos nga awit nila ni Max Surban, ug Ramon ‘Yoyoy’ Villame, ang ‘Joke Box King’ sa mga kanta nga Binisaya.

Gani sa ilang lungsod sa Cordova hilabihan siya ka inila tungod sa ilang mga ‘variety show’ nga ilang ipasundayag sa mga entablado. Diin ang iyang mga tistis o pasiaw sa mga kanta nga pakatawa, ug sa mga pakatok nga estorya, daghan usab kaayo kaniya ang manghugyaw sa pagpangatawa sa ilang ‘variety show’ nga gipasundayag sa entablado.

Si Arsenio ‘Enoy’ Limpangog, nagdala sa pangalan, nga alyas Michael Jackson, kadtong bantogan nga ‘singer-composer’ gitarista, didto sa nasud sa Amerika.

Nagkailhanay kami si Enoy, didto sa ilang mansiyon ni provincial board member Arleigh Sitoy, sa barangay Gabi, Cordova, tungod kay siya man usab ang pakantahon nila bahin sa politika ug ingon man usab, sa ‘Dinagat Festival’ nila ni Mayor Adelino B. Sitoy,   sa sulod sa Cordova sports complex.

Bisan ang trabaho ni Enoy usa lamang ka manunupi o barbero. Ang ‘Enoy’s barber shop’ gidugokan gayod sa mga kustomer kay samtang nagtupi si Enoy sa iyang kustomer nag-awit usab siya, tungod kay anaa may iyang sing-along.

Didto magminyo si Arsenio Limpangog sa Iligan City. Kay nagtaban sila si Miss Degamo nga iyang asawa. Ang trabaho nila didto boy ug maid ni congressman Mariano Badelles ug ingon man sa anak niini nga si Atty. Alipio ‘Tikbong’ Badelles’. Sa pagkatigom nila og kuwarta namauli sila dinhi sa lungsod sa Cordova ug nagtukod sa usa ka barberya. Diin ang kita niya sa matag adlaw nga panupi maoy gibuhi niya sa iyang pamilya. Walo kabuok ang ilang mga anak. May minyo nang babaye ug anaa nay ilang mga apo.

Talagsaon kining hiyas sa pagkatawo sa amigo kong barbero. Ang kahilig niya sa pagkablit sa mga kuwerdas sa sista. Hasta usab sa iyang arte sa pagkanta sa iyang mga ‘variety show’ sa ibabaw sa entablado. Daw si Michael Jackston gayod unta siya tungod sa iyang mga uniporme nga gisul-ob. Hasta, ang kalo sa iyang ulo sinundog.

Lakip na ang pagkanta ug pagsayaw sa programa. (Kataposan)