Platonic love

Gikiha si Atty. Richard Dagoc og kaso nga concubinage (pangabit o pamabaye) sa iyang kapikas nga si Norelyn. Duna man goy nakakita niya nga nisulod sa usa ka hotel kauban ni Atty. Delia Buaya, Clerk of Court sa Municipal Trial Court sa lungsod sa Clavigero. Ang nakakita niya kontra sa kliyente ni Richard. Ug may dautang motibo batok sa abogado.

Nisumbong si Byron Espino ni Norelyn. Ug nipirma’g Affidavit pagmatuod sa iyang nakita. Kay selosa kaayo si Norelyn, nipasaka gyud og kaso. Sila si Richard ug Delia ang gikiha. Gisang-at ni Norelyn ang kaso sa Prosecutor's Office sa panabang ni Byron.

Nasang-at gyud sa husgado ang kaso human ang prosecutor (fiscal) niisyo’g Resolution nga kunohay dunay probable cause (kapasikaran) o prima facie evidence (lig-ong ebidensiya sa unang tan-aw) ang kaso batok sa kiniha. Didto napunta ang kaso sa husgado ni Judge Jover Campus. Relihiyoso ang maong huwes. Ug dili siya gusto nga maungkag ang usa ka pamilya. Sa panahon sa pre-trial, gisuwayan sa huwes ang pag-areglo sa banag asawa. Gahi gyud ang asawa. Aron paglangan sa kaso unya paghatag higayon nga mabugnaw ang kihante, gipa-schedule sa huwes og mediation ang kaso. Duha ka bulan sa Mediation Office ang kaso. Unya gibalik sa Mediator ngadto sa husgado. Pakyas sa pag-areglo ang Mediator.

Gipaagi sa huwes og laing pre-trial ang kaso. Wa gihapon naareglo. Sa unang adlaw nga mopresentar na og testigo si Norelyn, nitambong siya ug si Byron. Wala siya’y pribadong abogado. Prosecutor o fiscal maoy iyang abogado. Si Richard ray abogado sa iyang kaugalingon. Hasta sab si Delia, abogada sa iyang kaugalingon. Sa wa pa sugdi ang bista, gipapangadye sa huwes ang Centennial Prayer. Pagkahuma’g pangadye, namulong ang huwes "Sa di pa ang bista, mosulay ko ining kasoha og Alternative Dispute Resolution. Makig-istorya ko sa kihante, kiniha ug testigos sulod sa chambers. Recess una ta" sa huwes. Gidukdok ang kahoy nga martilyo.

"Ikaw Mrs. Dagoc, sa wa pa ning kasoha, nakasala na ba imong bana nimo?" sa huwes dihang nahimutang na sila sulod sa chambers. "Sa uyab pa mi, judge, daghan siyang laing uyab" ni Norelyn. "Karong bana’g asawa na mo, nakasakop ka niya nga namabaye?" sa huwes. "Kini rang hitaboa" ni Norelyn. "Ikaw panyero Richard. Unsa may imong ikasulti karon?" sa huwes ngadtong Richard. "Ako ra gyung mintinahon akong counter affidavit, judge. Nga tinood nisulod ko’s hotel sa lawak ni panyera Delia. Duna lang koy gikuhang papeles gikan niya. Guwapa siya. Madanihon. Buotan. Kun ulitawo pa ko, makat-on tingali ko paghigugma niya. Kaso, minyo na ko. Ang akong gugma niya, platonic love ra gyud. Kanang gugma nga inamigo o inigsoon" ni Richard. "Huh! Huh! Huh!" nihilak si Delia. "Nganong nihilak ka man panyera?" sa huwes.

"Nadismayo lang ko, judge. Sorry lang daan, misis" ni Delia nga nilingi ni Norelyn. "Nakagusto man god ko ni Atty. Dagoc. Na-misinterpret lang nako iyang maayong tinagdan nako. Pagkatinood, gusto gyud unta kong may mahitabo namo sa hotel adtong higayona. Lonely man ko judge. Bag-o lang gibuwaga’g uyab. Apan singko minutos ra gyud si Atty. Dagoc sa akong lawak. Nagdali siya’g gawas human makuha ang Court Order nga para niya" ni Delia. Namahid sa luha. "Di diay tinuod ning unod sa Affidavit ni Byron nga tulo mo ka oras sa sulod. Unya sweet kuno kaayo mo paggawas" sa huwes. Nitan-aw ni Byron. Niduko si Bryon."Unsa mang orasa nakit-an nimo sila pagsulod sa hotel" sa huwes ngadtong Byron. "Alas onse sa buntag, judge" ni Byron. "Diin man ka gikan sa alas onse hangtud sa alas dos sa hapon?" sa huwes. "Nipauli. Unya nitawag dayon ko ni Mrs. Dagoc sa telepono mahitungod sa akong nakit-an" ni Byron. "Wa na ka nibalik sa hotel sukad adto?” sa huwes. "Nilabay ra man ko didto" ni Byron. "Wa diay nimo sila kit-i paggawas" sa huwes. Nilingolingo na lang si Byron.

"Iatras nalang nako ang kaso, judge" ni Norelyn. Nitindog unya gibunalan sa iyang bag ang tangkugo ni Byron. Naigking. Gisagpa ug gikusi siya ni Delia. Nikiros og panagang. Nilingiw ang huwes aron di kakakita sa hitabo. "Balik ta’s husgado aron ma-formalize ang pag-atras ni Mrs. Dagoc" dugang sa huwes. Niagbay si Richard ni Norelyn. (Kataposan) (Sa gusto’g libreng konsulta, dad-a ning pahina sa opisina sa tagsulat. Iatol og Sabado)