Ang sigben ni Serafin

Wala pa gani manugpa ang mga manok sa ilang batuganan, sayo kaayo nga gisusi ni Serafin ang nahimutangan sa iyang mga kanding nga dinha ra usab dapit sa luyo sa iyang balay. Mabdos ang iyang pinakapaborito nga kanding gani didto gayud niya kini gipahabalan sa kanding nga high breed og klase ni Felimon sa silingang barangay.

Gusto niyang makapaliwat og maayong klase mao nga iya gayud kining gikonsulta ni Maximo ang palahubog nga veterinarian kun unsay maayong feed supplements o mga vitamins alang niini. Segun sa iyang banabana karon gayung semanaha kini gitakda nga manganak. Pero labihan niyang kurata nanganak na tuod ang iyang binuhi pero lahi ang hitsura sa anak niini. Mora og sigben ang dagway ug bayhon niini.

Ilong tuwapos na ang ulitawong si Serafin ug mao kini nakasunod sa gamay nga luna sa yuta sa iyang mga ginikanan dinhi sa barangay Kambugasok. Sa edad nga trayenta wala pa gyud kini makasuway og uyab ug mao lay gihimong kalingawan niini ang pagpanguma, pagbasabasa og Banat News maingon man ang pag-atiman sa ilang kandingan.

Matud pa sa veterinarian nasobra siguro sa vitamins nga gipatomar sa kanding mao nga abnormal ang dagway sa anak niini. Bisan tuod og mao ra og sigben ang bag-ong anak nga kanding iya gihapon kining giatiman pag-ayo.

Usa ka adlaw niana samtang naghatag siya og kompay ngadto sa iyang mga kanding naagian siya ni Paquito, usa ka bogoy ug mangingilad sa Colon. Dakong pagkakurat ni Paquito pagkakita niya sa abnormal nga kanding.

"Uy!! Serafin aduna ka man lagi binuhi nga sigben," matud sa nakurat nga bogoy.

"Dili kini sigben bay, kanding kini naober lang sa vitamins mao nga naingon niini ang hitsura mora og sigben," tubag ni Serafin. May misantop dayon nga itom nga laraw sa nagtingsi nga si Paquito.

Pagkagabii niana. Hilom nga nibalik si Paquito kauban ang iyang sidekick nga si Maxie. Samtang maayong pagkahinanok ni Serafin, mainampingon nga nilipot ang duruha sa luyo sa balay niini diin didto nahimutang ang kandingan. Ilang gisignit ang kanding ni Serafin nga mora og sigben.

Pagkaugma niana didto sa dakbayan sa may Starbucks Coffee naghulat na ang contact nila ni Paquito ug Maxie nga si Don Bruno Peligroso. Dala na sa duha ka mangingilad ang kanding nga ilang gisulod sa karton.

"Dos siyentos mil kana Paquito ug Maxie, bayad kana niining sigben nga inyong gidala. Ang dugo kuno niini usa ka epektibo kaayo nga aphrodesiac nakahibalo man kamo nga pulos mga teen-ager ang akong mga kauyaban. Mora na unya ko ani og pound for pound king," matud sa dagko kaayo og ngisi nga tigulang ug maniac nga don dayon tunol niini sa paper bag nga gisudlan sa dakong kantidad ngadto sa duha ka bogoy.

Dagko usab kaayo og tingsi ang duha ka bogoy, human madawat ang dakong kantidad nibiya dayon sila sa Starbucks, ug didto kini nidiritso sa Ciriloz Beerhouse. Ug tungod sa dakong kantidad nga ilang nadawat gitingal dayon ngadto sa manager. Bisan og udtong tutok pa gipasugdan dayon sa manager ang floor show niini Tagutlo gayud ka mga babaye ang gi-table sa duha ka mangingilad.

"Ha! Ha! Ha! Nakailad na sab ta Maxie, nagtuo si Don Peligroso nga tinuod nga sigben ang atong gidala ngadto kaniya, abno nga kanding ra diay kadto. Inigkahuman niini modiritso ta sa casino. Sky is the limit. Let's paint the whole town with red horse and black label. Ha! Ha! Ha!" nagkayuring na ang ininglis ni Paquito.

Sa dihang mosakay na unta ang duha og taxi paingon sa casino kalit sila nga gibabagan sa duha ka polis.

"Kuyog namo sa presinto. Mga mangingilad kamo mini ang kuwarta nga inyong gibayad sa beerhouse."

"Unsa!! Mini sab diay ang kuwarta nga gibayad sa among mini nga sigben? Gigabaan ta ni Serafin." Kalit nga nahuwasan unya nagdungan og ngaab ang duha ka mangingilad. (Katapusan)