Hinog sa punoan

"Mo-report ka na ba karon sa trabaho?” Sukit ni Urielle dihang namahaw na sila.

“Oo,” maoy tubag. “Okey na man kaha ang pamati mo sa imong lawas?”

Mitando siya. Ug gitibawas nila ang pagpangaon.

Dihang naudto, misulod si Urielle sa iyang lawak. Gibati siya’g kalaay nga mao rang usa sa balay. Mitan-aw kadto siya sa salida sa TV human makapaniudto apan wala siya makagusto sa programa nga gipasundayag. Mao nga gipalong na lang niya kini ug nanghimudlay sulod sa iyang lawak.

Mao pa gani iyang paghigda sa mahunolhunol nga kama, mitingog ang message alert tone sa cellphone nga iyang gipatong sa lamesita dapit sa iyang ulohan. Iya kining gikab-ot. Gisusi niya kun kinsay nagpadala og text message. Si Patrick diay. Iya dayon kining gibasa.

“Kumzta? Nag-lunch na u?” Matud pa sa text ni Patrick.

“Human na.” Gitubag ni Urielle ang text ni Patrick.

Gibalik pagbutang ni Urielle ang iyang cellphone sa ibabaw sa lamesita human niya ika-send ang text message niya ngadto ni Patrick. Apan wala madugay, mitingog na usab ang message alert tone niini.

Gipunit ni Urielle ang cellphone ug gisusi. Si Patrick gihapon ang nag-text kaniya. Gidali niya’g basa ang text niini. -- Sumpayan pa