Anino sa kulto

GULA 147

“Husto si Dick, Tiyo,” sagbat ni Carlo aron paghatag og dugang katin-wan. “Wala kita makaila sa mga sakop sa kulto busa dili gayod kita angay mokompiyansa. Delikado nga kun ang tawo nga atong masultihan kun hain nato tagoi ang bata usa ka sakop sa kulto ug matultolan na hinuon nila kini.”

“Busa kinahanglang kita ra gyud ang masayod kun hain ang bata,” sa hepe pa. “Kinahanglang walay laing masayod sa atong mga plano. Dili gayod kita mokompiyansa.”

Niana dayong pagkabuntag, gihimo nila ni Carlo Guieb ang ilang gikasabotan aron mahilikay ang bata nga si Shantal sa mabangis nga mga disipulo sa Tambayawan Black Brotherhood. Ang bata ug ang inahan niini nga si Arlin didto mosakay sa awto nga gimaneho ni Carlo. Diyotay lang ang mga sapot nga ilang gidala nga gisulod sa dili sab kaayo dako nga bag nga abohon.

Igoigo ang gikusgon sa pagpadagan ni Carlo sa awto nga iyang gimaneho. Gisubay niya ang dalan paingon ngadto sa lungsod sa Carmen. Nagsunod kanila sa igong gilay-on ang sakyanan nga giluwanan sa mga polis nga gipangulohan ni Maj. Dick Campo. Nagdala kini’g upat ka sakop nga maoy magpabilin didto sa Carmen aron pagbantay sa inahan ug anak. Wala magsul-ob og uniporme ang mga polis. Ang awto sa hepe ang ilang gisakyan. Wala sila mogamit sa police car aron dili gayod mamatikdan kining ilang lakaw karon.

Samtang nagmaneho sa sakyanan, ang mga mata ni Carlo wala mahimutang. Sa matag karon ug unya mosil-ip siya sa side mirror sa awto aron pagsuta kun wala bay katingad-ang sakyanan nga nakasunod kanila. Apan ang awto nga gisakyan nila ni Maj. Campo mao ray iyang makit-an matag tan-aw niya sa salamin sa walang kilid sa awto. Nakapasalamat siya sa hilom.

Unsay ngalan sa igsoon ni Jimmy didto sa Carmen, Gaw?” Gigisi ni Carlo ang kahilom nga taudtaod nang mihabol kanila. Kaganina ra silang walay tingogay sukad sa ilang paggikan. Mao ray mipasulabi ang agungoy sa makina sa sakyanan.

“Roding,” tubag ni Arlin. “Magulang siya ni Jimmy.” -- Sumpayan pa