Gula 64
“Tingali’g ma-late ka na sa imong trabaho,” ni Urielle pagkamatikod nga taas na ang gintang sa adlaw didto sa sidlakan nga milusot sa bildo sa bentana.
“Di ko motrabaho ron,” ni Patrick pa. “Di tikaw biyaan nga ingon niini ang kahimtang. Atimanon ko ikaw.”
Nahinuklog si Urielle sa gipakitang pagpakabana ni Patrick sa iyang kahimtang. Iyang nasuta nga naghatag gayod diay kini og dakong bili kaniya. Importante diay siya sa kinabuhi ni Patrick.
Tuod man, wala gayod mo-report si Patrick sa trabaho niini nianang adlawa. Nagpunay lang kini’g apong kaniya. Nagpangutana kun unsay iyang gikinahanglan. Kanunay naghuwat kun duna siya’y ipamalihog. Giatiman siya’g maayo ni Patrick.
“Mosamot ka man diay kaguwapa kun may sakit,” gikomedyahan siya ni Patrick samtang gidulotan siya niini og paniudto.
“Ayaw’g bugalbugal diha,” ni Urielle pa. “Gusto ka tingaling magkasakit ko kanunay, no?”
“Dili, uy. Mas maayo pag ako na lang ang magkasakit kay sa ikaw.”
“Ulog-ulogi.”
“Tinuod lagi. Honey gud ka nako.”
Wala makasabot si Urielle sa iyang gibati. Mora’g misayaw ang iyang kasingkasing pagkadungog sa gisulti ni Patrick. Mahimong nagkomedya lang si Patrick sa mga pulong nga giluwatan niini. Apan seryoso ang pagdawat niini sa iyang kabubut-on. Nakapatambok kini sa iyang kasingkasing. -- Sumpayan pa