Hinog sa punoan

Gula 63

“Ayaw na lang. Wa ni kaso.”

“Unsay way kaso? Mas maayong mahiling ka og mananambal.”

“Wa lagi ni kaso. Nasobrahan lang tingali ko sa kahago kagahapon. Gipamulongan man gud nako ang labong nang mga tanom sa lagwerta sa atubangan bahin sa balay ug ingon man sa luyo. Nagkinahanglan ra tingali ko’g pahuway.

“Giingnan ta bitaw ka nga mokuha ta’g katabang aron may makaabag nimo sa mga bulohaton dinhi.”

“Di na lagi kana kinahanglan. Masugakod man nako ang mga bulohaton dinhi, ba. Ayaw lang kabalaka. Maulian ra lagi ko kun makapahuway na.”

Namatikdan ni Urielle nga mibati gayod og kabalaka si Patrick sa iyang kahimtang. Gitapin-an niini ang iyang agtang sa bukobuko sa kamot niini. Unya mahingawaon kining mitan-aw kaniya.

“Kadiyot lang, ha,” ni Patrick pa nga migawas sa kuwarto.

Pagbalik ni Patrick, nagdala na kini’g pagkaon alang kaniya. May dala usab kining tambal ug usa ka basong tubig.

“Kaon una,” matud ni Patrick. “Inigkahuman nimo’g kaon, lamya kining tambal.” Wala siya mokihol.

“Gusto ka nga hungitan tikaw?” Sukit ni Patrick.

“A-ayaw na lang,” ni Urielle nga mibati’g kaikog, milugos siya pagbangon.

Mikaon si Urielle sa pagkaon nga gidulot ni Patrick kaniya. Diyotay ray iyang gikaon kay ingon sa wala siya ganahing mikaon. Unya gitomar niya ang tambal nga gihatag ni Patrick kaniya. -- Sumpayan pa