You and me

February 14. Adlaw sa kasingkasing. Matag karon ug unya motan-aw si Hayde sa pultahan sa fast food nga nahimutangan niya karon. Naglingkod siya simpig sa bungbong nga bildo. Motan-aw sab siya sa iyang wrist watch. Alas dose sa udto.

Miinom siya sa giorder niyang iced tea. Gihulat niya si Edmund. Maoy ilang sabot nga magkita sila dinhi sa Jollibee Colon karong udto. Gitawgan niya kini ganinang buntag. Mahinungdanon ang iyang tuyo kang Edmund.

Milumpat ang iyang kasingkasing sa kalipay pagkakita kang Edmund nga misulod sa Jollibee. Nagpahiyom kini nga miduol kaniya. Gipugngan niya ang iyang gibati. Panahon na nga ang seguridad niya sa pagpuyo ang hatagan niyag bili.

“Ganina ka ra, Hayde?” Milingkod si Edmund sa atbang sa dalaga.

“Di pa lang dugay, Ed.” Hapit di makagawas ang tingog sa dalaga.

“Huwat una kay mag-order ko sa counter para sa atong paniudto.”

Igo lang mitando si Hayde nga mitan-aw kang Edmund nga mitindog. Naghinuktok si Hayde. Usa ka tuig na kapin ang ilang relasyon ni Edmund. Tinagotago nga relasyon. Managsama silang nagtrabaho sa opisina sa siyudad. Pero, managkalahi ang kompaniya nga ilang gialagaran. Bayinte singko ang edad ni Edmund, magulang niya kini og usa ka tuig.

Childhood sweetheart niya si Edmund. Usa ra ka dapit ang ilang gipuy-an sa siyudad maong nagkaila ug nagkasuod sila sukad pa kaniadto.

“May problema ba Hayde?”

Nakatan-aw si Hayde kang Edmund nga diha na sa iyang atubangan, nagpahimutang sa gi-order niining mga pagkaon ug drinks sa ibabaw sa ilang lamesa.

“Di matawag nga problema. Ed. Sayon rang sabton ang isulti ko ron nimo.”

“Unsa man?”

Mitan-aw si Hayde sa iyang mga pagkaon. Mikaon siya. Mikaon sab si Edmund.

“Minyo ka na, Ed. Hunungon na nato ang atong pagpakabuang. Magpakasal na mi si Paul.” Miginhawag lawom si Hayde. Gitutokan siya ni Edmund.

“Nasayod ba siya bahin nato?”

“Oo. Pero gidawat gihapon niya ang akong pagka babaye. Gimahal niya ako, Ed. Mahatagan niya akog kaseguroan sa pagpuyo uban sa among mga anak unya.”

Hayahay ang pagbati ni Hayde karong gabhiona samtang nagtindog sa terasa sa ilang balay. Luag ang iyang dughan. Nahanaw na ang kahuot niini. Unya nakita niya si Paul nga nagdangadanga sa ilang balay. Nagdali siyang nanaog gikan sa terasa. Nagdagan siyang misugat sa hinigugma.

“Gihatagan na kog kagawasan ni Edmund, Paul.” Migakos si Hayde sa ulitawo.

“Kita gyod ang para sa usa’g usa, Hayde. You and me sa usa ka gugma.” Hugot nga gigakos ni Paul ang dalaga. “Ug kay Valentines man ron, manuroy ta. Mangaon ta sa gawas. Sabotan unya nato ang atong kasal. Mamalaye ko uban sa akong mga ginikanan nimo.’’

“Oo, Paul. Oo.” Milamwas sa dughan ni Hayde ang gibati niyang kalipay. Hingpit na siyang nakalingkawas sa sayop nga gugma niya kang Edmund.

Nag-akob ang ilang mga ngabil. Gitagamtam nila ang katam-is sa ilang gugma.

“Happy valentine’s, Paul.” Hagawhaw ni Hayde dihang nag-ukang na ang ilang mga ngabil.

“Happy valentines, too, Hayde.” -- (Kataposan)