Anino sa kulto

Gula 144

Nahilom si Maj. Campo. Ingon sa naghinuktok kini sa paagi nga nahunahunaan ni Carlo. Gipasagdan lang sa detektib ang hepe nga mahiunlod sa halawom nga pagpalandong. Nagpakahilom na lang usab siya nga naghulat nga mamulong kini.

“Sige, Carlo,” mihukom ang hepe pagkataudtaod. “Himuon nako ang imong gisugyot. Magpili ko’g duha sa akong mga sakop nga maoy mohimo’g surveillance sa mga empleyado sa LCR.”

“Maayo hinuon,” ni Carlo pa. “Pero may lain pa kitang problema.”

“U-unsa kana?” mikunot ang agtang ni Maj. Campo nga ingon sa wala gyu’y ideya mahitungod sa iyang gisulti.

“Dili pa hingpit nga luwas sila si Tiya Marta ilabi na ang bata hangtod nga dili pa nato malumpag ang kulto,” pasabot ni Carlo. “Apan wala pa kita masayod kun kanus-a gayod nato masikop ang mga Anti-Kristo.”

“Dili kana problema,” ni Maj. Campo nga ingon sa nakaagpas na sa buot ipasabot sa detektib. “Hatagan nato sila’g proteksiyon. Magpili ko’g mga sakop nga maoy mobantay kanila. Duha sa adlaw ug tulo sa gabii.”

Mibathay sa panagway ni Carlo ang usa ka matagbawon nga pahiyom. Nagpasalamat siya sa hepe nga dali ra niyang ikasabot. Kanunay niining gisuportahan ang iyang mga plano.

Migawas si Belen ug miduol kanila.

“Gaw,” ni Belen pa. “Pasudlon ka kuno ni Papa. Kun mahimo, kamong duha si Chief.”

“Mosunod na kami, Gaw,” mubong tubag ni Carlo.

Mibiya dayon si Belen kanila human madawat ang tubag ni Carlo.

“Unsa man kahay tuyo sa imong uyoan?” nakapangutana si Maj. Campo.

“Masayran ta kana karon,” matud ni Carlo.

Misulod sila si Carlo ug Maj. Campo sa balay. Paghimuntog nila sa sala, maoy misugat sa ilang panan-aw sila si Tiyo Berto, Tiya Marta, Arlin ug Jimmy nga naglingkod sa sopa. Si Arlin naglingkod tupad ni Jimmy ug si Tiya Marta mitupad usab ni Tiyo Berto. Mihun-ag ang kaligdong sa ilang mga panagway. -- Sumpayan pa