Ubos sa landong sa Acacia

Daw namahit na ang naglagiting nga kainit sa adlaw sa pamanit ni Manoy Isidro mao nga nakahukom kini nga mopahulay una sa pagpangabuno sa iyang mga tanom. Didto siya mopaingon sa may punoan sa Acacia daplin sa iyang uma. Ang labong nga dahon niini nagahatag og kalandong ug kabugnaw sa palibot niini.

Namahid siya sa iyang singot pinaagi sa iyang labakara ug samtang iyang giyarok ang dala nga tubig, gibati niya ang tumang kalipay nga naglantaw sa iyang uma. Maayo og tubo ang mga nagkalainlain niya nga mga utanon sama sa talong, kalabasa, luy-a, banteyong ug uban pa. Salamat sa organic farming, ang inantigo nga pamaagi sa pagpanguma nga gidasig sa ilang barangay kapitan nga si Kapitan Danny Reromas.

Bag-o pa naangkon sa hingpit ni Manoy Isidro ang maong luna nga hapit moabot og duha ka ektarya. Kanhi saop lang si Noy Isidro ni Senyor Joel Larosa. Maayo gani kay nisugot ang buotan nga don nga iya lang datadatahan ang luna nga gitikad ug sa ubos pa gayud nga kantidad.

Nilarga man gud ngadto sa gawas sa nasud si Senyor Larosa kauban sa tibuok pamilya niini ug nakahukom nga adto na manimuyo. Dili matukib ang gibati nga kalipay ni Manoy Isidro nga sa katapusan sa ilang pamilya na ang luna nga iyang gitikad sulod sa hataas nga katuigan.

Kaduha sulod sa usa ka bulan, motungas ang mga komprador gikan sa Carbon market dinhi sa barangay Amorsiko aron pagpamalit sa ilang mga abot. Usa sa mga komprador mao si Mr. Aying nga nasuod na pag-ayo sa pamilya ni Noy Isidro. Gumikan niini niarang-arang ang ilang kahimtang sa pagpuyo.

Hingpit na unta ang kalipay ni Manoy Isidro kun wala pa magtuman sa gusto ang ilang bugtong anak ni Manang Menggay nga si Bobby. Gusto unta sa magtiayon nga kursong Agrikultura ang matapos niini. Gani kaniadto dinhi ubos sa landong sa Acacia iya nga gidaygan ang anak sa ilang plano sa inahan niini.

"Anak gusto namo ni Nanay Menggay nimo nga inig tapos nimo sa high school, kurso nga agrikultura maoy imong kuhaon aron imo pa nga mapalambo ang atong uma pinaagi unya sa modernong pamaagi," matud ni Noy Isidro.

Apan naunsa man nga dihang nakatapos na si Bobby sa high school nikuyog man kini sa pag-umangkon ni Mr. Aying nga adunay auto shop sa dakbayan sa Sugbo ug nag-alagad isip katabang sa maong auto shop. Daw nahugno niadtong tungora si Noy Isidro, dili tiaw ang kaguol nga gibati niini, sa iyang paminaw nasayang ang iyang dako nga pagpaningkamot aron lang maangkon ang uma nga gitikad nga iya unta nga gitagana alang sa kaugmaon sa iyang anak nga si Bobby. Nahadlok si Noy Isidro nga sa umaabot nga mga katuigan dili na madala sa iyang lawas ang pag-atiman sa ilang uma gumikan sa iyang taas taas na nga pangedaron.

Kalit lang naputol ang paghanduraw ni Manoy Isidro dihang may nabati siyang kasikas dapit sa iyang luyo. Sa iyang paglingi maoy nisugat sa iyang mga mata ang anak nga si Bobby.

"Tay nibalik ko dinhi sa atua kay naapil sa demolition ang auto shop sa pag-umangkon ni Mr. Aying didto sa dakbayan gumikan sa mall nga tukoron. Wala na koy trabaho tay. Mangayo unta ko og pasaylo ninyo ni nanay sa akong pagsupak ninyo kaniadto. Gusto na ko nga mopadayon pag-eskuyla ug moabag pagbalik nimo sa pag-atiman sa atong uma," matud sa kahilakon nga si Bobby.

Hilabihang lipaya ni Manoy Isidro sa gipamulong sa nahibalik nga anak. Iyang nagakos ang anak sa tumang kalipay.

May nihuros nga bugnaw nga hangin nga nakapasayaw sa labong ug lunhaw nga mga dahon sa Acacia dapit sa ilang nahimutangan mao ra kini og niduyog sa gibating kalipay sa amahan ug anak. (Kataposan)