Hinog sa punoan

Gula 61

“Ang ATM kana sa akong suweldo,” maoy tubag. “Kanang, usa, card kana sa SSS. Ako nang giusab ang akong civil status, from single to married. Ikaw nay akong gibutang nga beneficiary sa SSS.”

Wala motingog si Urielle. Apan sa hilom nahimuot siya sa gihimo ni Patrick. Giisip gayod diay siya niini nga asawa tungod kay gitugyan na man niini kaniya ang personal nga mga butang niini, lakip na ang may kalabotan sa kuwarta.

“Ikaw nay mokobra sa akong suweldo,” matud ni Patrick. “Ikaw na sab ang bahalang mamalit sa tanan natong mga kinahanglanon dinhi sa ba’y. Okey?”

Igo lang miyango si Urielle. Apan wala niya ikatago ang gibating kalipay pinaagi sa pinugngang pahiyom nga miaslay sa iyang mga ngabil.

“Para sab ni nimo,” ni Patrick nga mitunol sa usa ka gamay nga plastik nga may sulod nga gamay’ng kahon ngadto kaniya.

“Unsa man sab ni?” Sukit ni Urielle dayong dawat sa plastic.

“Tan-awa lang,” ni Patrick nga nagpahiyom.

Mibatig kaikag nga masayod, gikuha ni Urielle ang gamay’ng kahon gikan sa gisudlan niini nga plastik. Iyang giablihan ang kahon. Ug mibathay ang mahinangpong pahiyom sa iyang mga ngabil pagkakita sa butang nga gisulod sa kahon nga mibantang sa iyang mga mata. -- Sumpayan pa