Anino sa kulto

GULA 143

“S-sorry kaayo, Dick, ha,” namulong si Carlo dihang may misantop sa iyang kahimungawong. “Nahasol ka hinuon tungod niining hitaboa karon.”

“Ayaw kana’g hunahunaa,” ni Maj. Campo pa. “Katungdanan ko usab kini tungod kay ako ang hepe sa kapolisan niining lungsora. Katungdanan namo ang paghatag og proteksiyon sa mga lungsoranon.”

Nahilom sila. Ang usa’g-usa kanila ingon sa may gihunahuna. Pagkilab sa pipila ka daklit, si Carlo ang migisi sa kahilom.

“Wala ka ba magduda, Dick?” ni Carlo,” nga may mga empleyado sa munisipyo nga sakop sa kulto,” ni Carlo.“Nga-nganong nakapangutana ka’g ingon niana, Carlo?” misumbalik pagsukot ang hepe.

“Makapahibulong man gud,” ni Carlo pa. “Kadali ra kaayo silang masayod kun kinsa ang mga bata nga natawo sa Septiyembre 8, 1999.”

“Nan,” sa hepe pa. “Unsa man ang gusto nimong palutawon?”

“Wala kahay mga sakop sa kulto nga anaa magtrabaho sa buhatan sa local civil registrar?” Mipadayag si Carlo sa iyang pangagpas ug katahap.

“H-ha? Nakugang si Maj. Campo.

“Posible baya tingali nga matinuod kining akong pangagpas,” matud ni Carlo. “Kun may sakop sa kulto nga nagtrabaho sa LCR, dili gayod maglisod ang mga Tambayawan sa pag-ila kun kinsa kadtong mga bata nga natawo sa Septiyembre 8, 1999.”

Wala makatingog si Maj. Campo sa gipagawas sa mga hunahuna ni Carlo. Nahaduko kini. Ingon sa gihinuktokan niini ang gipamulong sa detektib.

“Malagmit husto ang imong katahap, Carlo,” namulong si Maj. Campo tapos sa taudtaod nga paghinuktok. “Posible tuod nga may disipulo sa Tambayawan nga anaa magtrabaho sa LCR. Ang pangutana kun kinsa siya?”

“Unsa kaha kun maghimo kita’g surveillance alang sa mga empleyado sa maong buhatan?” Mihatag og sugyot si Carlo. -- Sumpayan pa