Mao pa gani ang paghiabot ni Terry gikan sa iyang gitrabahoan, gisugat dayon siya sa iyang asawa nga si Euping, ug giingnan. "Dinhi to kaganiha si Mr. Aragon ay. Ug nangita kanimo.
"Ngano man kuno?" Gipanguta ni Terry ang iyang asawa. Nahibulong man gud siya kaayo, kun nganong nangita kaniya si Mr. Aragon. Dili man gani ni motagad kaniya kanang magkasugat sila sa dalan. Mora lang og dili sila magkaila. Labon unta, managsilingan ra man sila.
"Nangimbitar uroy to. Adto kuno ta papanihapona sa ila karong gabii," tubag sa asawa.
"Unsa man kahay nakaon sa karaho?" ni Terry pa, nga nagduhaduha pa gayud sa pagtuo.
"Adlaw man kuno sa iyang asawa. Ug maghikay kuno sila gikan pa gihapon sa asawa ni Terry. Unya, mipadayon kini pinaagi sa pagsukot sa iyang bana. Unsa man, mangadto ta?"
"Nabuang ka? Magpakaulaw ta didto? Dili man gani na sila managad kanato, kanang ikasugat nato sila sa dalan," daling tubag ni Terry ngadto sa asawa. Dayon og sulod sa iyang kuwarto.
Wala madugay, nabatian nalang nila nga may nagsangpit sa ilang silong. Maong gisugo dayon ni Terry ang iyang asawa, nga ipatan-aw kun kinsa kini.
"Hain man diay si Pare Terry?" Nangutana kang Luping ang usa sa mga diha sa silong. Nga pulos ra usab nila mga kaila ug silingan pa gyud.
"Dia ra man. Yuna pa kay akong tawgon," ni Luping pa, dayo’g sulod sa kuwarto aron sa pagtawag sa iyang bana.
"Unsay ato kaninyo?" Nangutana dayon si Terry, ngadto sa iyang mga silingan nga diha sa ilang silong.
"Dili diay mo mangadto sa balay nila ni Mr. Aragon?" Sukot ni Pablito sa magtiayon.
"Wala diay mo imbitaha Pre?" Laing pangutana na usab ang gipasupot sa kumpare ni Terry nga si Ruel.
"Giimbitar man. Apan unsaon dili man kuno moadto kini si Terry." Si Euping maoy mitubag.
"Uy, usikan ninyo ang higayon? Pakal na gud na. Adtuon ta na uy," misagbat si Beling ang ig-agaw ni Terry.
"Bitaw total personal man sab ta nga giimbitar ni Mr. Aragon," mitimang usab si Juaning, ang asawa ni Ruel.
"Wala mo mahibulong kun nganong giimbitar ta sa pamilyang Aragon?" Gipangutana ni Terry ang mga silingan nila nga diha sa silong.
"Bitaw da. Nahibulong bitaw ko kun nganong nausab ang kinaiya sa mga Aragon.
"Wala diay mo mahibawo nga molansar man si Mr. Aragon pagka mayor sa atong lungsod?" mikalit na sab og salga si Fredo.
"Husto tuod da. Molansar man diay ni kontra kang Dr. Aryl. Ang kasamtangan natong mayor sa umaabot nga piniliay. Sa ato pa pamugaspugas na kining iyang gihimo," ni Ruel pa usab.
"Kun mao kana ato usab pahimuslan kining maong kahigayonan. Mintras, gihatagan pa ta nila’g importansiya. Busa mangadto ta sa ila. Aron sa pagtambong sa ilang hikay!" Hapit magkadungan ang pipila ka mga silingan nila ni Terry. (Kataposan)