Lacaron, San Fernando, Cebu
Naputos sa pagtamay si Ines ning ilang mga silingan nga makigminyo kang Tinong nga hilabihan na ka tiguwang ug mapadpad na lang gani ngadto sa pagkatumba kun mahanginan. "Tan-awa ... Ines, unsay resulta nianang imong kabuang nga makigminyo ka ni Tinong, nga mas maguwang pa man gani siya sa naanhing mong amahan?", misinggaak sa tumang kalanog ang tingog ni Uray Peran.
"Bahala na lang sad og dili ka maminyo, kay sa mo-suicide ka sa pagpakasal nianang hilabihan na kaapyogon nga tiguwang?"
Ang tanan nga gisulti sa inahan ni Ines nga taudtaod na usab nga nabiyuda kang anhing Saryo, wa kini igsapayan ni Tinong nga niadtong higayona nakapamati diay.
"Tunlon ko ang tanang pagtamay sa imong inahan Ines, makita ra man unya niya ang katag?" luhaan ang mata ni Tinong.
Sa gabii human sa kasal ni Tinong ug Ines, hapit tanang mga silingan nila ning ilang balangay sa Bugho giabot gayod og dili tiaw nga kabalaka sa umaabot nga dangatan ni Tinong nga seguro matodas og kamatay gumikan sa pagkalulid na og lawas. Ambot unsang pagkahitaboa ... didto man pahigdaa ni Uray Peran ang iyang anak nga bag-o lang gikasal sa may pikas nga sibay?
Gumikan ba kaha sa kahubog ni Tinong sa iyang giinom nga bahalina ... nagpataka nalang kini og sulod sa may pikas nga sibay nga gihigdaan ni Uray Peran?
Ang nagpid-ok nga siga sa lamparaliya, maoy nakadugang og kangitngit. Nag-brownout man god ang sugang dagitabnon sa VECO.
Hilabihan nga nakahinanok si Uray Peran niadtong gabhiona ilabi na nga ang laag nga hinuyohoy panagsa mosapigad kaniya nga gibuga gikan sa bukiran sa Bugho.
Sa sinugdan wa lang kadto panumbalinga ni Uray Peran nga dihay kagahi nga iyang nahikapan. Apan sa kadugayan dihay iyang namatngonan nga may mihuot ubos sa iyang bilahan. Maglisod siya og singgit sa pakitabang. Seguro nahinanok na pag-ayo ang iyang anak nga bag-ohay lang gikasal.
"Tabangggggg ..... Inesssssss ..... kayyyy hilabihangggggg ... hapdosaaaaa saaa ubossss saaa akonggggg bilahannnn!" nagkanguhal ang tingog ni Uray Peran. Maoy namat-an ni Uray Peran nga naunay diay siya og digamo ni Tinong nga sa iyang paminaw ... hunit pa sa tul-an sa kabaw. (Kataposan)