“Kinahanglan nga on red alert na kita karon, Dick,” nagkanayon si Carlo sa tingog nga tugob sa kaligdong.
“Ngano man diay?” midiyong ang mga mata sa hepe nga nahitutok pag-ayo kang Carlo.
Ingon sa nahan-ay nang daan ang tanan nga igsusulti ni Carlo Guieb ngadto kang Maj. Dick Campo. Tin-aw kaayo niyang gibatbat ang iyang mga detalye. Si Maj. Campo maduloton kaayong namati sa iyang mga sugid. Wala gayod magtingog ang hepe hangtod nga nahuman siya sa iyang pag-asoy.
“Husto ang imong gibuhat, Carlo,” nagkanayon si Maj. Campo human ikaasoy ni Carlo ang tanan. “Angay tuod nato silang bantayan. Posible nga kadtong nagsakay sa awtong itom nga nagpaatbang sa imong balay mga sakop sa kulto. Malagmit nakatimaho sila nga ang imong iyaan nakahunahuna sa pagpatabang nimo.”
“Mao usab kanay akong pagtuo, Dick,” ni Carlo pa nga milantaw ngadto sa gawas sa koral. Ania sila magsultihanay sa lagwerta sa balay sa iyang iyaan. “Kami gayod ang gipanid-an sa nagsakay niadtong maong awto.”
‘Wala ba nimo makuha ang plate number sa maong sakyanan?” sa hepe.
“Wala gayod,” tubag ni Carlo. Dili maklaro sukad sa among nahimutangan ang plake sa sakyanan.”
“Nameligro karon ang kinabuhi sa imong iyaan,” matud sa hepe. “Malagmit nasayod na ang mga sakop sa kulto nga misuka na siya nganha kanimo bahin sa ilang mga tinagoan ug ila kining pahilumon sama ni Dr. Castro.”
“Mao bitaw nga nanawag ko nimo,” ni Carlo pa. “Dili nako sila maakos pagbantay.”
“Ang maayo natong buhaton karon mao nga dili kita mangatulog,” sugyot sa hepe. “Magbantay kita sa tibuok gabii.”
Igo lang miyango si Carlo. Wala siya motubay sa gipamulong ni Maj. Campo kay dihay iyang gihunahuna. Lawom kaayo ang iyang pagpalandong. -- Sumpayan pa