Hinog sa punoan

Gula 58

Sa laing bahin, gikahinangop hinuon ni Urielle ang gihimo ni Patrick. Hangtod niining higayona, dili pa gayod siya hingpit nga andam sa mahitabo kanila. Makadawat na hinuon tingali siya kun may mahitabo na gayod tali kanilang duha apan ingon sa dili pa kini ikalipay sa hingpit. Kini tungod kay may nakulang pa sa ilang panagtipon-- ang gugma sa usa’g-usa.

Gipaningkamotan niya nga makakat-on sa paghigugma kang Patrick. Malaomon siya nga makakat-on ra siya sa paghigugma sa lalaki inig-abot sa tukmang panahon tungod kay alang kaniya, dili man kini lisod higugmaon. Karon nga kanunay na silang magkauban sulod sa usa ka balay, dako ang kahigayonan nga ma-develop gayod ang iyang pagbati ngadto kang Patrick.

Apan si Patrick, gitudloan usab kaha sa lalaki ang kaugalingon niini sa paghigugma kaniya? Dili kaha siya lisod higugmaon alang kang Patrick? May mga higayon nga dugkaron ang kaisipan ni Urielle niining maong mga pangutana.

Nagtipon sila pagpuyo nga sama sa matuod gayod nga magtiayon. (Kay unsa pa ba diay ang angay itawag kanilang duha? Dili ba nga magtiayon na man gayod sila sa mga mata sa Dios ug sa tawo?)

Giasikaso ni Urielle si Patrick isip iyang bana. Iyang gituman ang iyang mga obligasyon ngadto niini. Siya’y maghikay sa ilang pagkaon. Siya ang mag-utaw sa sinina nga isul-ob niini alang sa trabaho. Iyang gihimo ang tanang mga bulohaton sa panimalay nga angay sa usa ka asawa. -- Sumpayan pa