Estoryahe!

Gula 2

Gipanid-an ni Mike og unsay himoon sa babaye karon nga nakalakaw na kadtong lalaki nga iyang gikaestorya.

Nakita ni Mike nga may gikuha kini sa iyang bag. Cellphone diay ang gikuha ug daw may gikontak. Taud-taud mitingog ang call alert sa cellphone ni Mike.

Dali kini niya nga gitubag sa hinay nga paagi. “Ari na Sir Mike sa lobby sa Waterfront kay human na ang among miting ug sa akong kliyente,” matud sa babaye.

Karon, nasiguro na g’yud ni Mike nga ang gwapa nga babaye nga naglingkud sa usa sa mga lamesa sa lobby sa hotel mao si Atty. Geraldine.

“Naa na ko paingon Atorni,” mubo nga tubag ni Mike samtang naghinam-hinam nga magkatagbo na g’yud sila pag-usab.

Naglibog si Mike kun ngano nga makigkita man ang babaye kaniya nga nakuha na man unta ang iyang lisensya human kini niya dakpa.

Gituyo ni Mike nga sa luyo ni Atty. Geraldine siya miagi aron dili siya makita samtang moduol sa iyang lamesa.

“Hi, maayong gabii nimo Atorni,” pangatahuran ni Mike. “Kumusta? Wala g’yud ko makalimot sa imong dagway,” dali nga tubag.

Miorder si Atty. Geraldine og makaon ug mainom nila ni Mike. Mora’g dili makaharong si Mike ni Geraldine kay gawas nga abogada kini, gwapa kaayo ang maong babaye.

“Nagdali ka ba Sir Mike?” ni Geraldine pa. “Wala man, okay ra Atorni. Ang lalaki nga makauban sa mga babaye nga sama kagwapa kanimo dili pul-an bahala’g magbuntag,” matud ni Mike.

Nakakatawa si Geraldine pagkadungog sa gisulti ni Mike nga may dala nga bulatik. “Estoryahe!” sa abogada pa nga tam-is kaayo’g pahiyom ngadto sa LTO agent.

“Bitaw Atorni, unsay akong ikaalagad nimo?” nagpakisayud g’yud si Mike.

Gipasabut siya sa abogada nga gusto lang siya nga daygon sa personal si Mike sa tininuod niya nga pagpatuman sa balaud.

“Abi nimo Sir, aw pwede ba’g Mike na lang ang akong itawag nimo ug tawga lang usab ko’s akong angga nga Dina or Din,” pasakalye sa abogada.

“Sa una gud, gidakop usab ko’g traffic enforcer kay mihunong kuno ko sa No Parking area, apan gipangayoan ra ko niya’g kwarta bugti sa dili pagsakmit sa akong lisensya. Bisan nasayud ko nga dili tukma, gipaundayonan na lang nako siya. Pero ikaw Mike, lahi kay tinarong g’yud ang imong paagi sa pagpanakop,” pasabut sa abogada.

Nahinangop kaayo si Mike nga gidayeg siya sa abogada. Nasabtan ni Mike nga mora’g gaan kaayo ang gwapa nga abogada kaniya. May nahuna-hunaan si Mike. Estoryahan niya ang abogada aron maangkon ang iyang pagbati. (Sumpayan)