Anino sa kulto

GULA 140

“Mao lagi,” ni Jimmy pa. “Wala gayod namo damha nga moabot kining higayona sa among kinabuhi.”

Wala na motubay si Carlo sa gipamulong ni Jimmy. Sa wala pa molamay ang ilang panagsulti, nangayo una siya’g panihapon kay mihilab na ang iyang tiyan sa kagutom. Si Belen mikiros pag-andam og pagkaon sa kusina.

Samtang naghulat sa agda ni Belen nga nag-andam sa panihapon, gipahimuslan ni Carlo ang higayon. Mitawag siya ni Maj. Dick Campo gamit ang iyang cellphone. Pero wala niya makontak ang hepe. Matud pa, out of coverage area kini.

Gipataudtaoran ni Carlo. Pagkilab sa pipila ka gutlo, gikontak niya pag-usab ang cellphone sa hepe. Mibagting kini. Nakapasalamat siya sa hilom. Wala madugay nabati niya ang tingog sa hepe didto sa pikas tumoy.

“Kaganina ra kong nanawag nimo pero dili ka man makontak,” ni Carlo pa.

“Sorry kaayo,” sa hepe pa. “Na-low bat ko.”

“Dinalian kaayo kining akong tuyo nimo, Dick,” nagkanayon si Carlo nga wala na magpaligoyligoy. “Dia ko karon sa balay sa akong iyaan, sa Apitong Street. Gikinahanglan ko ang imong suporta niining higayona.”

“Ngano man diay, Carlo? Sukit sa hepe.

“Ari na lang unya kita mag-estorya og maayo,” matud ni Carlo. “Mas maayo nga magdala ka’g pipila ka polis.”

Ug gipahungaw na ni Carlo ang iyang tuyo sa hepe.

Igo gayod nahuman og panihapon si Carlo nahiabot si Maj. Campo nga may kuyog nga unom ka sakop. Gituman gayod sa hepe ang iyang gihangyo nga magdala kini’g mga kauban. Pulos armado ang mga polis nga kauban sa hepe. Gimandoan sila sa hepe sa pagbantay sa palibot sa balay.

“Unsa ba kining imong kalaki, Carlo?” ni Maj. Campo nga wala pa makatugkad sa lintunganay kun nganong gipatawag kini ni Carlo dinhi sa balay sa iyang iyaan. “Kalit man kaayo kini.”

“Tinuod kana, Dick,” ni Carlo pa. “Kalit man usab gud ang pahibalo ni Tiya Marta.”

Wala motingog ang hepe. Midagkot kini’g sigarilyo ug nanabako. -- Sumpayan pa