Hinog sa punoan

Gula 56

“Maayo ba ang imong pagkatulog kagabii?” Misukna si Patrick taliwala sa ilang pagpangaon.

“M-maayo man,” may pag-ukon-ukon ang iyang tinubagan.

“Good,” ni Patrick pa.

Mipadayon sila pagpangaon.

“Hangtod ba karon mataha gihapon ka nako?” Nangutana na usab si Patrick. “Mauwaw gihapon ka nako?”

Wala dayon makatubag si Urielle.

Nahimut-okan si Urielle. Wala dayon siya makatingog. Nakamatikod diay si Patrick nga may kataha ang iyang mga lihok sa ilang panag-uban. Miduko siya. Nauwaw siya kang Patrick. Naikog siya nga namatikdan sa lalaki nga dili siya komportable sa ilang panag-uban.

“Ayaw na kataha nako,” nagkanayon si Patrick. “Kinahanglang anaron mo na ang imong kaugalingon. Kita na ang mag-uban kanunay tungod kay magtiayon na man kita.”

“P-pasensiya na, Patrick...”

“Nakasabot ko. Nasayod kong maanad ka ra sa kadugayan. Wala ka pa lang maka-adjust sa bag-o natong kinabuhi.”

Wala motingog si Urielle.

“Ako gani,” ni Patrick pa, “nabag-ohan man niining kinabuhia. Pero mas praktikal tingali ko kay kanimo mao nga mas dali ra kong naka-adjust.” -- Sumpayan pa