Paggawas ni Urielle sa banyo human makakaligo, iyang natukmaan nga nagmata na si Patrick. Mipahiyom kini pagkakita kaniya.
“Good morning, Honey,” timbaya ni Patrick kaniya.
“G-good morning,” mibalos siya pagtimbaya ngadto niini.
Mibanos si Patrick kaniya pagsulod sa banyo ug naligo. Samtang didto si Patrick sa banyo, nag-ilis si Urielle. Nagdali siya aron dili maabtan si Patrick. Mauwaw siya kun maabtan ni Patrick nga nag-ilis.
Igong nakahuman pag-ilis si Urielle, nahigawas usab si Patrick gikan sa banyo. Kadali rang nakailis ang lalaki.
“Mamahaw na ta,” agda ni Patrick kang Urielle.
“A-asa man?” Sukit ni Urielle.
“Sa dining saloon ning hotel.”
“Ikaw ang mag-igo.”
Nanggawas sila sa ilang lawak. Nangadto sila sa dining saloon sa hotel. Sa usa ka bakanteng lamesa nga nahimutang dapit sa suok, didto sila mipahimutang. Gikuha dayon ni Patrick ang menu book ug gitamdan. Ang usa ka menu book gitunol sa lalaki ngadto kang Urielle.
“Pagpili og gusto nimong orderon,” sa lalaki pa.
“Ikaw lay pili,” ni Urielle.
Si Patrick ang mipili sa mga pagkaon nga ilang gi-order. Pag-abot sa ilang gi-order nangaon gilayon sila. -- Sumpayan pa