Anino sa kulto - Gula 137

“Wala pay usa kanamo nga nakakita sa supremo,” tug-an sa iyaan. “Gihimo niyang misteryo alang kanamo ang iyang pagkatawo.”

“Siya ang inyong supreme master ug nagatuman kamo sa iyang mga sugo,” ni Carlo pa. “Giunsa man niya pagpaabot sa iyang kamandoan kaninyo kun tinuod nga wala kamo makaila ug makakita kaniya?”

“May cellphone ang kulto, Dong,” pasabot sa iyaan. “Manawag kanamo ang supremo kun aduna siya’y order alang kanamo.”

Nahilom si Carlo. Naghunahuna siya. Karon namatud-an na niya nga tinuod gayod ang gisulti ni Dr. Castro sa buhi pa kini nga walay usa kanila nga nakaila o nakakita sa supremo sa Tambayawan. Mao usab kini ang gisulti ni Annabelle, ang anak ni Dr. Castro nga gipatay usab paglabay sa pipila ka adlaw human niya kakuhai’g pamahayag.

Unya, tuhaw lang dunay mibadhas sa iyang hunahuna.

“Dili kaha mga sakop usab sa kulto ang akong mga ginikanan, Tiya?” nangagpas si Carlo. “Ug nakasala sila hinungdan nga gisilotan sila sa kamatayon sa inyong supremo?”

“Dili ako makatubag nianang maong pangutana, Dong,” mubong tubag sa iyaan. “Wala man gani ako mahibalo nga sakop diay sa kulto ang nagpatay kanila.”

“Sila ang akong mga suspek, Tiya,” ni Carlo pa. “Daghan na ako’g nahipos nga mga pruyba nga sakop gayod sa Tambayawan ang miutang sa kinabuhi sa akong mga ginikanan.”

“Pasayloa ko, Dong,” ni Tiya Marta pa. “Wala gayod ako’y ikasulti kanimo mahitungod niana.”

Wala na lang pugsa ni Carlo ang iyaan.

“Tabangi kami, Dong,” namulong si Tiya Marta taliwala sa iyang kahilom. “Nameligro ang kinabuhi ni Shantal karon. Siya ang sunod nga ipapatay sa supremo, Dong.”

“Ayaw kabalaka, Tiya,” ni Carlo pa nga mihupay sa kabalaka nga gibati sa iyang iyaan.“Karon dayon i-report ko kini sa kapolisan.” -- Sumpayan pa