Anino sa kulto - gula 136

“I-imo diay kining nakit-an, Dong?” misumbalik pagpangutana ang iyaan.

“Oo, Tiya,” daling tubag ni Carlo. “Ako kining gihiposan. Imo ba kadtong maong panyo?”

Mitando si Tiya Marta.

Nakapanglingo si Carlo. Wala siya makasabot sa iyang gibati niining bag-ong mga kamatuoran nga iyang nasayran. Bisan anino na lang sa katahap, wala gayod siya magdahom nga ang iyang iyaan usa ka disipulo sa Tambayawan Black Brotherhood.

“Kanus-a ka lang mahimong sakop sa kulto, Tiya?” laing pangutana ang gipasupot ni Carlo.

“Kami maoy labing unang sakop sa Tambayawan dinhi sa Mabini, Dong,” tubag sa iyaan. “Dul-an na sa tulo ka tuig kaming nag-alagad sa maong kulto.”

“U-unsay kami?” mikunot ang agtang ni Carlo nga mitutok sa iyaan. Duna siya’y buot klarohon sa gisulti niini.

Miginhawa una’g lawom si Tiya Marta una motubag: “Sa among pamilya, Dong, si Belen na lang ang nagpabilin sa tinuohang Katoliko. Ang imong Tiyo Berto sakop usab sa kulto. Lakip sila si Jimmy ug Arlin mga disipulo na usab sa Tambayawan.”

“Ngano man, Tiya?” ni Carlo pa. “Unsa may hinungdan nga misulod kamo niining maong matang sa tinuohan?”

“Maglisod ako sa pagpasabot kanimo sa tanan,’ nagkanayon si Tiya Marta. “Ang ikasulti ko lang mao nga ang pagsulod ko sa maong pundok maoy labing dakong sayop nga hukom nga akong nahimo sa tibuok kong kinabuhi.”

“Sumala sa akong nasayran,” matud ni Carlo. “Usa ka babaye ang giilang supremo sa Tambayawan. Nakaila ka ba kaniya, Tiya?”

“Wala ako makaila kaniya, Dong,” laktod nga tubag sa iyaan.

“Unsay buot mong ipasabot?” nahitutok si Carlo sa iyaan. -- Sumpayan pa