Hinog sa punoan

Gula 53

Sa kahimtang nga nagbukot sa habol sukad sa ulo paingon sa tiil, dili masayod si Patrick nga nagpitokpitok ang iyang mga mata ilawom sa habol nga nagtabon kaniya. Gipanid-an niya ang mga lihok niini. Inanay nga mikusog ang butokbutok sa iyang dughan dihang milingkod kini sa ngilit sa iyang higdaanan.

Miluag ang iyang gibati dihang mitindog si Patrick. Nagpadayon siya sa pagpaniid. Wala madugay, nabati niya ang pagkaabli sa pultahan sa banyo. Unya nasira kini pagbalik. Ug nabati ni Urielle ang linagasak sa shower sulod sa banyo. Naligo si Patrick!

Misamot ang kakulba ni Urielle. Midako ang iyang kabalaka. Sa gihimo ni Patrick, nag-anam kadako ang iyang pagtuo nga may mahitabo gayod tali kanila karong gabhiona. Misantop sa iyang hunahuna nga gusto ni Patrick nga presko kini nga makigpinarayganay kaniya.

Paglabay sa pipila ka gutlo, nabati ni Urielle nga naabli ang pultahan sa banyo. Migawas na si Patrick. Wala maglihok si Urielle nga nagbukot sa ilawom sa habol. Halos pugngan niya ang iyang pagginhawa. Dili siya buot nga makamatikod si Patrick nga nagmata pa siya. Nagpadayon siya sa pagpaniid sa mga lihok sa lalaki.

Sa iyang paminaw, mora’g may gikurikuri si Patrick. Unya mora’g nagpasopaso kini sulod sa ilang lawak. Nagdundon sa kantang Power of Love nga gipasikat sa Air Supply. -- Sumpayan pa