Hinog sa punoan

Apan dili pa gayod siya andam alang sa usa ka butang nga mahitabo kanila. Dili pa siya andam nga motahan sa iyang kaugalingon ngadto kang Patrick bisan og iya na kining bana tungod kay wala siya’y gugma ngadto niini. Wala sila magkahigugmaay. Naminyo sila nga wala mag-agi og usa ka relasyon.

Nabatyagan hinuon ni Urielle nga nakabaton na siya og hilom nga pagdayeg sa kabuotan ug maayong mga hiyas ni Patrick. Mi-admire na siya sa kaambong ug kinaiya nga nabatonan niini. Mao na tingali kini ang gitawag nila og crush. Pero dili pa kini gugma. Lahi ang crush kay sa matuod nga gugma. Ang crush usa lang ka pagyukbo ug pagdayeg sa mga hiyas sa usa ka tawo, samtang ang gugma usa ka pagbati nga andam motugyan sa tanan ngadto sa lalaki nga gimahal.

Mao nga dili pa gayod andam si Urielle sa posibleng mahitabo tali kanila ni Patrick niining unang gabii human sa ilang kasal. Apan kun tinguhaon man gayod ni Patrick ang pag-angkon sa iyang pagka-babaye karong gabhiona, nasayod siya nga dili niya kini kabalibaran. Dili siya makahimo sa pagbawo kang Patrick sa unang gabii sa ilang kaminyoon.

Lapas na ang alas dose sa tungang gabii sa dihang misulod si Patrick sa lawak nga ilang giokupahan sa hotel. Nahitagpilaw na gani si Urielle. Nahigmata lang siya gumikan sa pag-igot sa pultahan nga natukas sa pagsulod ni Patrick. -- Sumpayan pa