Ang kalooy nga labaw pa sa gugma

Puslan man nga way nakasabot kanako," matud ni Piolo nga gibalibaran sa uyab. "Maayo pa'ng magpakamatay." "Ayaw!..., kay gihigugma ko ikaw." Mihilak si Katrina." Apan, kun maoy imong gusto nga pakaslan ko ang imong igsoon, buhaton ko kana."Hugot nga migakos kang Piolo.

Mao kadto ang katapusang eksena sa gugma nila ni Piolo ug Katrina. Karon, ani-a siya sa lubnganan sa iyang igsoon. Nanumbalik usab sa panumduman niya, kadtong mga malipayong higayon uban sa iyang maguwang nga si Crispin.

"Piolooo, Crispin, asa ba ning mga bataa uy," matud sa ilang inahan.

"Di-a ra mi, mama!" Dungang nanglugwa gikan sa kamaisan," di-a mi nakit-ang pistola Ma, nga gitay-an na pag-ayo," dayong hatag ini sa inahan."

"Ah, mao kini ang gigamit ni papa ninyo sa lalakeng buot molugos kanako," asoy pa sa inahan. "Adto sa'ng higayona namatay sad si papa ninyo kay gi-atake kini."

"Intawon ni Papa, sagdi lang ma, kay kami si manoy andam manalipod nimo."

"Pagkabuotan sa akong mga anak. Magpabilin unta kamo nga mag-inunungay ug maghinatagay, isip nga managsoon."

Pipila ka tuig ang milabay, namatay ang ilang pinanggang inahan. Mga ulitawo na ang duha. Malipayon. Makugihon. Mi-abunda ang gitikad nga kabilin. Pinangga ug suod ni Piolo ang maguwang nga si Crispin.

Usa ka higayon ana, may gihangyo ang maguwang kang Piolo." Dong, dili ko kamao manguyab. Busa pangulitawhi para kanako si Katrina, pakaslan ko siya."

"Ikaw ang masunod Noy." Bisan sukwahi kini sa iyang kabubut-on, apan di siya kabalibad sa maguwang. Wa magdugay, human sa kasal ni Crispin ug Katrina, mipahilayo si Piolo ug wa na magpakita, aron di matugaw ang bag-ong magtiayon.

Milabay ang mga tuig, gi-anunsyo sa TV nga namatay si Crispin. Mipauli siya. Nahi-igking si Piolo, sa dihang gikablit ni Katrina."Hoy tana, ay'g palabig kaguol, tingalig ikaw na say masakit," gihapuhap niya."Kay duna ko'y isorpresa kanimo ig-abot nato sa among balay." Paspas silang nanglakaw, kay hapit na mo-ulan.

"Unsa man ni?" Giablihan ang bag nga gitunol kaniya ni Katrina, sa didto na sila sa balay. "Oy, kadaghan ba aning kuwartaha -- diin man ni ninyo?'

"Mao kana ang imong bahin, ang katungang kita sa banika nga gipatigum ni Crispin, sukad pa niadtong wala kana magpakita kanamo."

"Katrina, mitaliwan na si manoy Crispin," mibakho siya. "Dawata kining bag nga isorpresa ko usab unta kang manoy, nga alang sa inyong maayong kaugmaon." Gibilin ang duha ka bag. Dayong milakaw apan gipugngan ni Katrina nga naghilak.

"Piolo, nag-inusara na lang ko, maka-ako ka ba sa pagbiya kanako? Migakos siya.." Kun wala ka nay gugma kanako, pangayoon ko na lang ang imong kalooy kanako."

Taudtaod niana, nawa ang katugnaw sa palibot, sa dihang mikuyanap na ang kainit sa ilang pagginaksanay. Og mitubod sa mga mata, ang luha sa kalipay.

"Oo, Katrina, dili ka mahigawad sa akong kalo-oy, kay labaw pa kini sa akong gugma diha kanimo." (Katapusan)