Ebidensiya sa abilibad

Sa di pa ta mag-istorya, gusto kong masayod ka nga nagrespeto ko sa imong kagawasan ug katungod sa pagsulti kun unsay naa sa imong hunahuna" ni Atty. Byron Espino ngadto ni Romeo Brusas samtang nag-atubang sila sa pantawan sa balay sa mga ginikanan sa naulahi. "Unsay buot nimong ipasabot atorni?" ni Romeo nga bag-o lang nitungab sa botelya sa serbisa. May gigunitan sab si Byron nga botelya. Ibabaw sa lamesa sa ilang tunga, may plato sa kinilaw.

"Mahimong magtoo ko nga sayop o dili maayo ang imong masulti sa atong panagkulokabildo karon. Apan akong panalipdan sa akong kinabuhi ang imong kagawasan ug katungod sa pagsulti ana. Mao nga kun di ka kauyon sa akong masulti, imo sang labanan akong kagawasan ug katungod sa pagsulti ana" ni Byron. Nitungab sa botelya sa walang kamot. "OK ko ana torni. Una sa tanan, nalipay ko nga nianhi gyud ka’s amo. Nibisita sa among gamay'ng payag dinhi sa lungsod sa Ipanore," ni Romeo. Nipunit og usa ka hiwang kinilaw.

Nanagana lang si Byron kay gipahibawo siya daan ni Marjorie inahan ni Romeo, nga borokento ni iyang anak. Labi na’g makainom. Ang mga ginikanan gyud ni Romeo ang nihangyo ni Byron nga pakig-istoryahan ilang bugtong anak. "Basin pa maminaw nimo" ni Marjorie.

Nakliyente ni Byron si Marjorie kay nabiktima og adik nga hubog. Hapit unta siya logusa gikan nangompra bisag adlaw'ng dako. Hamtong na si Marjorie. Dili na gyud matawag nga seksi. Apan ang diperensiyado’g utok nga sabog, way gipili. Gikiha lang ni Byron ang sabog og kaso nga acts of lasciviousness (malaw-ay nga binuhatan) kay naluwas si Marjorie sa mga estambay.

Ining adlawa, nagdulong ang piyesta sa Ipanore amihanang Sugbo. Unya naghakad si Fernando, bana ni Marjorie sa ilang panagatan. Naingganyo si Byron kay hilig og kilaw.

"Nagkasabot na ta nga karong buntaga, puwede ta maglalis. Apan way away" ni Byron. Gibutang gyud niya’s seguro nga di magbayolente si Romeo. "Dili ko makig-away nimo atorni oy. Puwede man gani himoa’g sala sa abogado ang way sala, unsa pa kaha ang makasala," ni Romeo. Niabli’g laing botelya gikan sa case ilawom sa lamesa. "OK. Naa koy pangutana nimo. Nganong di man ka moeskuyla?" ni Byron. Napatiurok kadiyot si Romeo. Daw nakalitan sa maong pangutana. "Nakahuman na man ko’g hayiskul. College level na ko. Alang nako, nakat-onan na nako tanang angay tun-an para mabuhi," ni Romeo. "Biliba gyud nako nimo Rom oy! Palamanoha ko bi" ni Byron. Nagpahiyom nga nilamano gyud sa tuong kamot sa ulitawo. Nagpahiyom sab si Romeo nga mapasegarbuhon. "Unsa man pananglitan imong abilidad?" ni Byron. "Suheto ko sa electronics. Dugang pa, drayber ko, mekaniko, ug electrician" ni Romeo.

"Unya, dunay nipatrabaho nimo?" ni Byron. "Akong mga barkada" ni Romeo. "Dili diay permanente imong trabaho?" ni Byron. "Dili" ni Romeo. "Kanang kompanya sa pribado o gobyerno. Nakatrabaho ka?" ni Byron. "Nisulay ko’g apply. Apan mangita lagi’g diploma o sertipiko" ni Romeo. Nagminghoy. "Kun may diploma pang mapalit, unsa mang diplomaha imong gustong paliton?'' ni Byron. "Kana untang Electronics Communications Engineering" ni Romeo. "Maayo gyud diay ka’s electronics" ni Byron. "Nganong di man ta katrabaho kun way diploma?" ni Romeo. "Kana maoy nindot nga pangutana. Ako, sa wa pa ko naabogado, kamao na ko manglaban. Kamao na ko manghimo og affidavit o bisan unsang dokumento. Wa gyu’y nagpahimo nako’g dokumento. Pagkaabogado nako, dihang naa nakoy diploma gikan sa Supreme Court, una pa akong mga higala ug mga silingan nagpahimo nako’g dokumento. Mao sab na nimo. Bisag kamao pa, way magpadrayeb nimo kun wa ka pay lisensiya" ni Byron.

"Sa ato pa torni, kinahanglang duna gyud tay ebedinsiya sa nakamahoan? Dili igo nga kamao lang ta?” ni Romeo. "Korek ka diyan!" ni Byron. Nag-apir sila. "Moeskuyla na ko sunod semester" ni Romeo."Mangihi una ko kadiyot" ni Romeo. Nanaug. Dihang tua pa sa ihianan si Romeo, nanggawas iyang mga ginikanan. Nagpaminaw lang diay sila sa sulod sa sala. Malipayon kaayo silang nagpasalamat ni Byron. (Kataposan) (Sa gustog libreng kunsulta, dad-a ning pahina sa opisina sa tagsulat. Iatol og Sabado)