Tsiks killer

Gula 42

Nakakita og paagi si Mar aron pagsulbad sa iyang problema. Nag-inartista siya ug nagpatoo nga naguol. Naghinuktok siya og kunohay gihimo niya nga subo ang iyang dagway.

“Nganong lonely ka man og dagway karon Kuya Mar nga birthday man unta nimo?” wala makapugong ang 16-anyos nga si Clea sa pagpangutana kang Mar.

Mikagat ang iyang taktika. Nagpasuko-suko dayon si Mar samtang nagpatugtog pa siya sa kinaham niyang mga awit. “Kinsa bay dili masuko nga birthday nako karon, mosuroy unta ko apan gihatagan hinoon ko og trabaho,” ni Mar pa.

Daw nahimong seryoso ang dagway sa lima ka hinigugma ni Mar. Halos sila magkadungan og pangutana. “Ngano diay Kuya Mar?” Milihok dayon ang utok sa radio announcer. “Absent ang among news writer nga moandam sa mga balita para ugma sa buntag, naunsa ba nga ako man hinoo’y gihatagan og order nga maoy mopreparar sa news para ugma.”

Gituyo ni Mar sa paglingo-lingo ang iyang ulo nga kunohay daw sa naguol. “Birthday nako ron, gusto unta ko nga mosuroy, unsaon man karon pagsuroy nako nga mag-andam pa man ko sa mga balita para buntag.”

Hilom ang mga bisita ni Mar, ilabi na ang lima niya ka hinigugma nga wala magkahibaw-anay nga gilumpong sila sa tsikboy nga announcer. Human sa programa, nag-iya-iya og pamauli ang iyang mga tigpaminaw. Apan mibalik si Virgilio ngadto sa news room nga didto si Mar nagpatuo nga busy kaayo sa pagbuhat og balita.

“Kuya Mar, ako lang usa nga ubanan si Vivian sa gawas, ako lang ipatuo nila nga kami ang magkuyog pero mobalik ra mi diri,” matud ni Virgilio nga nagkatawa.

Tuod man, wala mosipyat si Virgilio sa iyang saad. Mibalik kini sa newsroom paglabay sa tunga sa oras ug kauban gihapon niya si Vivian.

“Kuya Mar, nahibulong ko aning Virgilio kay mobalik g’yud siya diri nga busy ka sa trabaho,” matud ni Vivian nga wala g’yud intawon masayud sa matuod.

Mitindog si Mar ug giagbayan si Vivian. “Okay ra Vian, dia ra man diay daghang news materials nga gibilin ang akong kauban, kini na la’y gamiton namo para buntag.”

“Tana, manglakaw na ta,” dayong kuha ni Mar sa yawe sa iyang motor diha sa ibabaw sa lamesa.

“Vir, asa ka man karon, angkas lang sa motor kay i-drop tika,” tanyag ni Mar. Gi-drop ni Mar si Virgilio sa iyang gipuy-an sa Mabolo. “Sigi, sirit na mo, basin baya og mangawala mo ha,” komedya ni Virgilio sa higala.

“Unya kita Vian, asa man ta? Pwede ba’g lipayon mo ako atul sa akong birthday?,” ni Mar ngadto sa hinigugma. (Sumpayan)