Tsiks killer

Gula 41

“Asa man ta mag-celebrate karon sa imong birthday Mar. Adto baya mi karon sa estasyon atol sa imong program,” giingnan ni Vivian ang radio announcer nga iyang hinigugma.

Wala motubag si Mar kay nasayud siya nga maglisud siya pagbahin sa iyang oras sa lima niya ka hinigugma. Karon pa lang gani nga dia pa siya sa ilang Vivian, nagplano na siya nga motapon na usab sa ila ni Carmen.

Gidapit ni Vivian si Mar nga adto na lang sila manihapon mao nga wala dayon makabiya ang radio announcer. Gabii na nga nakalakaw si Mar. Midiritso siya pagpaingon sa ila ni Carmen.

Naabtan ni Mar si Carmen nga nagluto og pagkaon. Usa ka semana pa sa wala pa ang birthday ni Mar nga si Carmen nagpahibalo nga mag-andam siya og pagkaon sa paborito niyang announcer.

Bisan og busog na si Mar, apan mikaon gihapon siya kay dili niya buot nga mahiubos si Carmen kaniya. Sila si Carmen, Glo ug Vivian, parehong nakatilaw sa pagka tsikboy ni Mar.

Gitan-aw ni Mar ang iyang relo de-pulso ug nananghid siya kay alas 9:15 na sa gabii ug hapit na ang iyang programa.

Gi-parking dayon ni Mar ang iyang motor pag-abut sa estasyon ug nagdali nga misaka aron andamon ang iyang kagamitan sa programa, apan napahunong siya pag-agi sa visitors area kay daghang mga tigpaminaw nga nagpaabot niya.

Nakita ni Mar nga lakip sa daghan niyang mga bisita nga nagpaabot kaniya mao si Charisse ug si Clea. Sila si Charisse ug Clea nakasinati na usab og kumbati sa kama uban ni Mar.

Wala g’yud magpaila si Mar nga may relasyon siya uban sa bisan kinsa sa iyang mga tigpaminaw.

Pagsugod sa programa ni Mar, nagtupad pa sila si Charisse ug Clea nga naglingkud atubangan sa radio announcer.

Nabuhong si Mar kay ang tanan niyang mga tigpaminaw mi-greet kaniya ug duna pay nangimbitar. Apan takulahaw lang nga nag-ulhos-ulhos nga miabot ang lain pang mga hinigugma ni Mar.

Diha na g’yud ang lima ka hinigugma ni Mar dihang nangabut sila si Vivian, Glo ug Carmen. Sa lima ka babaye, si Carmen ang nagpa-charming ngadto sa announcer.

Ang higala ni Mar nga si Virgilio didto ra maglingkud sa technician’s booth ug nagsige og pahiyom nga nagsud-ong kang Mar nga gilibutan sa iyang lima ka hinigugma.

Nasayud siya nga naglibog na kini karon kun kinsa ang iyang ubanan human sa programa. Naibog kaayo si Virgilio sa iyang higala nga radio announcer nga nakatilaw og lainlaing potahe, apan karon nakasinati og grabeng problema. (Sumpayan)