Gihatod siya ni Patrick sa ilang lawak sa hotel. Hamugaway ang lawak nga adunay duha ka kama. Gipaandar ni Patrick ang aircon ug gibuksan ang TV. Dayon gihatag sa lalaki ang remote control ngadto kang Urielle.
“Ikaw lang una dinhi,” nagkanayon si Patrick. “Atimanon ko pa ang nahibilin natong mga bisita.”
“Padayon lang,” ni Urielle.
Migawas si Patrick sa lawak. Gitrangkahan ni Urielle ang pultahan ug nag-ilis siya’g sinina. Dayon mihigda siya sa mahunol-hunol nga kama.
Nabatyagan niya karon ang kaharuhay sa iyang kahimtang. Mora ba’g kalit lang nausab ang dagan sa iyang kinabuhi human siya nakasal ngadto kang Patrick. Apan wala niya kalikayi nga mobati’g kabalaka kun mosantop sa iyang hunahuna ang pangutana kun unsa gayo’y sangpotanan sa kaminyoon nila ni Patrick nga matawag og tinuyo o buya.
Gabii na. Gikulbaan si Urielle. Sa dili madugay, mosulod na si Patrick sa lawak nga iyang nahimutangan. Nasayod na siya kun unsay posibleng mahitabo kanila niining gabhiona. Ang iyang gikabalak-an kay dili pa siya segurado kun andam na ba siya pagtugyan sa iyang pagka-babaye ngadto ni Patrick.
Pero wala na siya’y laing mahimo niining higayona. Ang giampingan niyang kaputli nga gusto unta niyang adto itugyan sa lalaki nga maoy matuod niyang gihigugma, dili niya kapanalipdan sa higayon nga magtinguha na si Patrick sa pag-angkon niini. Bana na niya si Patrick. Dili na siya makabalibad sa bisan unsa nga gustong mahitabo niini tali kanila. May obligasyon na siya ngadto kang Patrick isip asawa niini. -- Sumpayan pa