Hinog sa punoan

Dihang hapit na sugdi ang seremonyas sa kasal, nasigpatan niya si Nelson nga nagbarog sa usa ka suok sa simbahan. Nia si Nelson! Nagpaantaw lang kini kanila. Kalit lang siyang gikulbaan. Nabalaka siya nga tingalig magmugna si Nelson og kasamok sa kasal nila ni Patrick.

Dihang gisugdan na ang seremonyas sa kasal, wala mahimutang si Urielle. Ang iyang hunahuna didto ra kang Nelson. Nganong mitambong pa man gayod kining tawhana sa iyang kasal? Nakasukot siya sa hilom sa iyang kaugalingon.

Miabot na ang bahin sa seremonyas diin gitagsatagsa pagpangutana sa pari sila si Urielle ug Patrick. Human tubaga ni Urielle ang pangutana sa pari nga andam siyang modawat ni Patrick Arcanghel nga mamahimo niyang bana, nasigpatan niya nga mihinay si Nelson paggawas sa simbahan.

Mora’g naibtan og tunok si Urielle. Nagpasalamat siya sa hilom nga wala magmugna’g kasamok si Nelson sa kasal nila ni Patrick. Apan mibati siya’g kaluoy ngadto sa ulitawo. Alang kaniya, maayo pa lang unta kadto’g wala na lang motambong si Nelson aron dili kini masakitan pag-ayo.

“Mabuhi ang bag-ong kasal!” Nagkanayon ang pari human sa seremonyas. Gisundan kadto sa hugyaw sa katawhan nga misaksi sa seremonyas. Nag-ilogay ang mga nanambong sa pagpig-it sa mga kamot nila ni Urielle ug Patrick aron pagpahalipay sa ilang kaminyoon. -- Sumpayan pa